काठमाडौं – अविनाश विक्रम शाहको निर्देशनमा तयार भएको नेपाली चलचित्र ‘एलिफेन्ट्स इन द फग’ ले विश्वकै प्रतिष्ठित कान्स फिल्म फेस्टिभलमा गौरवपूर्ण ‘जुरी प्राइज’ हात पारेको छ। फेस्टिभलको महत्त्वपूर्ण मानिने ‘अन सर्टेन रिगार्ड’ विधाअन्तर्गत यस नेपाली चलचित्रले उक्त ऐतिहासिक सफलता चुमेको हो। नेपाली चलचित्र उद्योगका लागि विश्वमञ्चमा प्राप्त यो एक निकै ठूलो र गौरवशाली उपलब्धि हो। स्मरण रहोस्, यसअघि पनि निर्देशक शाहकै लघु चलचित्र ‘लोरी’ ले कान्समा ‘स्पेसल मेन्सन’ अवार्ड जितेर नेपाली सिनेमाको बलियो उपस्थिति जनाएको थियो।
यसै विधाअन्तर्गत अन्य प्रतिस्पर्धी चलचित्रहरूले पनि विभिन्न पुरस्कार प्राप्त गरेका छन्। अस्ट्रियाली निर्देशक सान्द्रा वोल्नरको चलचित्र ‘एभ्रिटाइम’ ले यस विधाको मुख्य ‘अन सर्टेन रिगार्ड प्राइज’ जित्न सफल भएको छ भने फ्रान्सेली निर्देशक लुइस क्लिसीको ‘आइरन ब्वाय’ लाई ‘स्पेसल जुरी प्राइज’ प्रदान गरिएको छ। अभिनय तर्फको विधामा, राफिकी फारियालाद्वारा निर्देशित ‘कंगो ब्वाय’ का अभिनेता ब्राड्ली फियोमोना डेम्बेआसेटले उत्कृष्ट अभिनेताको अवार्ड उचालेका छन्। त्यसैगरी, भालेन्टिना माउरेल निर्देशित चलचित्र ‘सिएम्प्रे सोय तु एनिमल मातेर्नो’ का तीन कलाकारहरू मरिना डे टाभिरा, डानिएला मारिन नाभारो र मारिएन्जेल भिलेगासलाई संयुक्त रूपमा उत्कृष्ट अभिनेत्रीको पुरस्कारबाट सम्मानित गरिएको छ।
विश्वभरका सिनेकर्मी र दर्शकको ध्यान तान्न सफल यस वर्षको कान्स फिल्म फेस्टिभल आज विधिवत् रूपमा समापन हुँदैछ। आजै हुने समापन समारोहसँगै फेस्टिभलको मुख्य विधा (कम्पिटिसन) तर्फका विजेताहरूको समेत औपचारिक घोषणा गरिने कार्यक्रम रहेको छ।