उपराष्ट्रपति पुनलाई राम्रो लाग्यो ‘क्याप्टेन’



उपराष्ट्रपति नन्दबहादुर पुन ‘पासाङ’ ले चलचित्र ‘क्याप्टेन’ हेरेर प्रशंसा गरेका छन् । सोमवार काठमाडौंको कमलपोखरीमा रहेको विग मुभिजमा श्रीमतीसँग पुगेका उनले चलचित्रको कथा र कलाकारहरुको अभिनय मन परेको बताए । उनले युवापिढी र राष्ट्रवादीहरुलाई फिल्म हेर्न पनि आग्रह गरे ।

फिल्म हेरिसकेपछि पत्रकारसँग संक्षिप्त कुराकानी गर्दै उनले भने- ‘एकदमै राम्रो लाग्यो चलचित्र । सबै नेपालीले एकपटक छुटाउन नहुने चलचित्र बनेको छ । स्वास्थ्य, समृद्धि र देशका लागि खेल भन्ने सन्देशसहित चलचित्रले खेलभित्र देखा पर्ने विकृतीहरुलाई पनि देखाएको छ । साथै चलचित्रले खेल र देशप्रति माया गर्नेहरुलाई ठूलो शिक्षा पनि दिन्छ ।’


उनले चलचित्रका निर्माता तथा अभिनेता भुवन केसीलाई ‘महानायक’ को उपाधिले सम्बोधन पनि गरे । अभिनेता केसीले नेपाली फिल्म क्षेत्रमा गरेको योगदानको सम्मान गर्दै उपराष्ट्रपति पुनले भने- ‘उहाँले राष्ट्रका लागि महत्वपूर्ण फिल्म (क्याप्टेन) बनाउनुभएको छ । उहाँलाई म धेरै-धेरै धन्यवाद दिन चाहन्छु ।’ उनले उज्वल भविष्यको कामना गर्दै चलचित्रका अभिनेता अनमोल केसीलाई ‘सुपरस्टार’ को उपाधिले पनि सम्बोधन गरे ।

तर, उपराष्ट्रपति पुन चलचित्र हेरेपछि अनमोलभन्दा अभिनेत्री उपासना सिंह ठकुरीको ठूलो फ्यान भएछन् । उनले अभिनेत्री ठकुरीको प्रशंसा गर्न कुनै कञ्जुस गरेनन् । ‘उहाँ कला क्षेत्रमा परफेक्ट लाग्यो । उहाँलाई असाध्धै राम्रो नायिकाको रुपमा मैले भेटाएँ र उहाँको भविष्य मैले राम्रो देखेँ’, उनले भने । अर्की नायिका प्रियंका एमभीको बारेमा भने उनले केही बोलेनन् ।

उपराष्ट्रपतिसँगै चलचित्र हेर्न अभिनेता शिव श्रेष्ठ, कलाकार तथा निर्माता किरण केसी, गायिका अञ्जु पन्तलगायत पनि पुगेका थिए । अभिनेता शिवले चलचित्रको मेकिङको प्रशंसा गरेर थाकेनन् । उनले फिल्मको मेकिङमा नेपाली चलचित्र क्षेत्रमा भुवन केसीजस्तो अरु नभएको पनि दाबी गरे । उनले चलचित्र ‘क्याप्टेन’ हेरेपछि आफू रोएको पनि बताए । ‘यो विशुद्ध नेपालीपन बोकेको चलचित्र हो’, उनले भने ।


एक मध्यम वर्गीय युवकले देशका लागि फुटबलमा गोल्ड मेडल जित्न गर्ने संघर्षको कथामा यो चलचित्र आधारित छ । चलचित्रलाई दीवाकर भट्टराईले निर्देशन गरेका हुन् । कथा सामिप्यराज तिमल्सिनाको हो । भुवन केसी निर्मित चलचित्रमा सुनिल थापा, प्रशान्त ताम्रकार, विल्सन विक्रम राईलगायतका कलाकारहरुको पनि अभिनय छ । यो चलचित्र अहिले दोस्रो सातामा प्रदर्शनरत छ ।

प्रतिक्रिया दिनुहोस्
About Thuloparda

Thuloparda Media Pvt. Ltd.

Reg No.: 160/073-74 (Suchana Vibhag, Nepal)

Publisher: Jiwan Kumar Parajuli

Editor: Subrat Raj Acharya

Phone: 9851194755

Address: Anamnagar, Kathmandu, Nepal

Email: [email protected]

All the photos & other materials, do not use or reproduce without authorized permission.

Designed by Appharu