गुलशन भन्छन्, ‘मलाई नेपाली खाना मनपर्छ’ (फोटो र भिडियोसहित)



भारतीय चलचित्रका चर्चित खलनायक गुलशन ग्रोवर तेस्रो पटक नेपाल आएका छन् । आफू अभिनीत पहिलो नेपाली चलचित्र ‘द म्यान फ्रम काठमाडौं’ को प्रिमियरका लागि मंगलवार दिउँसो काठमाडौं ओर्लिएका उनले बुधबार दिउँसो पाटन दरवार स्क्वायरमा सयौं नेपाली दर्शकसँग प्रत्यक्ष साक्षात्कार गरे । उनले नेपाल र नेपालीको प्रशंसा गर्न पनि छाडेनन् ।

निर्माण टिमले आयोजना गरेको चलचित्रको प्रमोसनल इभेन्टमा उनले आफू पहिलो पटक आफ्नो सबैभन्दा मिल्ने साथी मनिष कोइरालासँग नेपाल आएको सम्झिए । उनले भने- ‘तपाईंहरुको देशकी अभिनेत्री मनिषा (कोइराला) मेरो सबैभन्दा मिल्ने साथी हुन् । उनैसँग म पहिलो पटक नेपाल आएको थिएँ । दोस्रो पटक यही चलचित्रका लागि र यो तेस्रो पटक हो ।’


उनले आफूलाई नेपाल सबैभन्दा मनपर्ने देश रहेको बताउँदै भने- ‘मलाई नेपालको सबै कुरा मनपर्छ । नेपाली खाना मनपर्छ । नेपालको सुन्दरता मनपर्छ । नेपालको कल्चर मनपर्छ ।’ उनले नेपालीहरु एकदम इमान्दार हुने पनि बताए । दर्शकहरुको अत्याधिक मागपछि गुलशनले आफ्ना चर्चित हिन्दी चलचित्रका डाइलगहरु पनि सुनाए ।


उनी बिहीवार राजधानीमा हुने ‘द म्यान फ्रम काठमाडौं’ को प्रिमियरमा सहभागी हुनेछन् । आफूले अभिनय गरेको पहिलो नेपाली चलचित्र हेरेर प्रतिक्रिया दिन पनि उनले दर्शकलाई आग्रह गरे । यो चलचित्र यही शुक्रवारबाट देशभर प्रदर्शनमा आउँदैछ । अन्तर्राष्ट्रिय बजारलाई मध्यनजर गरेर निर्माण गरिएको यो पहिलो नेपाली चलचित्र हो । पेमा धोन्डुप यसका निर्देशक हुन् ।


गुलशनसँगै पाटन दरवार स्क्वायरमा चलचित्रकी अभिनेत्री आना शर्मा, कलाकार शिशिर बाङ्देललगायत उपस्थित थिए । नकिम उद्दिनले यो फिल्म निर्माण गरेका हुन् । चलचित्रमा अमेरिकी अभिनेता जोसे म्यानुअल, पाकिस्तानी अभिनेता हमिद शेख, नेपाली कलाकारहरु कर्मा शाक्य, नीर शाह, आमिर गौतमलगायतको पनि अभिनय छ ।

भिडियो :-

प्रतिक्रिया दिनुहोस्
About Thuloparda

Thuloparda Media Pvt. Ltd.

Reg No.: 160/073-74 (Suchana Vibhag, Nepal)

Publisher: Jiwan Kumar Parajuli

Editor: Subrat Raj Acharya

Phone: 9851194755

Address: Anamnagar, Kathmandu, Nepal

Email: [email protected]

All the photos & other materials, do not use or reproduce without authorized permission.

Designed by Appharu