नेपाली चलचित्र हेर्न उत्सुक प्रकाश झा



‘गंगाजल’, ‘अपहरण’, ‘राजनीति’ जस्ता चलचित्र दिएर दर्शकको विश्वास जितेका भारतीय निर्देशकका निर्देशक प्रकाश झा नेपाल अन्तर्राष्ट्रिय फिल्म फेस्टिभल (निफ) मा सहभागी हुन नेपाल आइपुगेका छन् । बिहीबार राजधानीको राष्ट्रिय सभा गृहमा भएको फेस्टिभलको उद्घाटन कार्यक्रममा उनले फिल्म फेस्टिभल कलाको उत्सव भएको बताउँदै आफू नेपालमा विभिन्न देशका संस्कृति चलचित्रमार्फत् हेर्न उत्सुक रहेको बताए ।

निफमा स्वदेशी तथा विदेशी चलचित्रको फिचर विधाका मुख्य निर्णायकको जिम्मेवारी पाएका उनले फेस्टिभलमा उत्कृष्ट नेपाली फिल्म पनि हेर्न पाउने विश्वास व्यक्त गरे । ४० वर्षदेखि चलचित्रमा काम गरिरहेको बताउँदै उनले हरेक दिन इन्जोय गरिरहेको बताए । ‘४० वर्षदेखि चलचित्रमा काम गरिरहेको छु तर कुनै दिन यस्तो छैन जहाँ मैले यो काममा इन्जोय नगरेको हुँ,’ झा सुनिए ।

उनले नेपाल आफ्नो दोस्रो घर रहेको पनि बताए । ‘म नेपालको बोर्डर बिहारमा जन्मिएको हुँ । मलाई नेपाल दोस्रो घर जस्तै लाग्छ । हाम्रा गाइवस्तु समेत चर्नलाई नेपाल जान्थे । यसरी नेपालसँगको नाता गहिरो भए पनि काठमाडौं आएको भने पहिलो पटक हो । चलचित्र कारणले नेपाल आउन पाउँदा खुशी लागेको छ,’ झाले भने । उनी पहिलो पटक नेपाली चलचित्र हेर्न निकै उत्सुक देखिए ।

सभामुख अग्नि सापकोटाले पानसमा बत्ति बालेर नेपाल अन्तर्राष्ट्रिय फिल्म फेस्टिभलको उद्घाटन गरेका थिए । उनले कार्यक्रममा फेस्टिभल जीवन्त र सजिव अन्तरक्रिया हुने थलो भएको बताउँदै महोत्सवले गुणस्तीय चलचित्र निर्माणमा नेपाली चलचित्रकर्मीलाई प्रेरित गर्ने विश्वास व्यक्त गरे । बिहीवारबाट सुरु भएको फेस्टिभल ५ दिनसम्म राष्ट्रिय सभागृह, पर्यटन बोर्ड र सर्वनाममा चल्नेछ ।

फेस्टिभलमा सहभागी हुन ४० देशका चलचित्रकर्मी नेपाल आइपुगेको निफका अध्यक्ष केपी पाठकले बताए । उनले महोत्सवको नयाँ संस्करणमा देखाइने फिल्म तथा छलफलले नेपाली चलचित्रलाई विश्व बजारमा पुर्‍याउन ठोस योगदान गर्न सक्ने धारणा राखे । निफ उद्घाटनको अवसरमा चाइनीज चलचित्र ‘कम्पोजर’ देखाइएको थियो । शुक्रवार भने डिजिटल चलचित्र सम्बन्धि वर्कसप हुँदैछ ।

प्रतिक्रिया दिनुहोस्
About Thuloparda

Thuloparda Media Pvt. Ltd.

Reg No.: 160/073-74 (Suchana Vibhag, Nepal)

Publisher: Jiwan Kumar Parajuli

Editor: Bharatmani Regmi

Phone: 9851194755

Address: Anamnagar, Kathmandu, Nepal

Email: [email protected]

All the photos & other materials, do not use or reproduce without authorized permission.

Designed by Appharu