निखिल भन्छन्, ‘साँझको ५ बजेपछि सर्नु हुँदैन भन्ने कोरोनालाई थाहा छैन’



कोरोनाको संक्रमण फैलिन नदिन सरकारले ‘लकडाउन’ गरेपछि धनाड्य हुन् वा मजदूर, सबै घरभित्र नजरबन्द हुनुपरेको छ । तर, नेपाली फिल्म एक्सन स्टार निखिल उप्रेती घरलाई खोर भन्ने शब्द प्रयोग गर्न रुचाउँछन् । बाध्यताले कुनै ठाउँमा बाँधिएर बस्नुपर्छ भने त्यसलाई घर भन्न नमिल्ने उनको तर्क छ । जति नै सुःख सुविधाको घर भए पनि बाध्यताले एकै ठाउँमा बस्नु परे त्यो खोर हुने उनी बताउँछन् ।

फेसबुकमा एक भिडियो सन्देश साझेदार गर्दै अभिनेता निखिल उप्रेतीले भनेका छन्, ‘म घर भन्दा पनि खोर भन्ने शब्द प्रयोग गर्न चाहन्छु । एक किसिमको अहंकार र घमण्डले मात्र हामीले घर, महल, दरवार भन्न थालेका हौं । जब बाध्यताले कुनै ठाउँमा बाँधिएर बस्नुपर्छ भने जति नै सुःख सुविधाको घरहरु पनि खोर हुन्छ । अहिले हामीलाई खोरमा बस्न कोरोनाले बाध्य गराएको छ ।’

मानिसले गरेको गल्तीकै कारण कोरोना आएको उनी बताउँछन् । निखिल भन्छन्, ‘विज्ञानले प्रगतिको पराकाष्ट कुनैमा गरेको छ भने त्यो हात-हतियारमा हो । अहिले विश्वका कतिपय देशसँग क्षणभरमा विश्वलाई समाप्त पार्ने हतियार छन् । हामीले हिंसा र हत्याका लागि नै विज्ञानको प्रयोग गर्दै आएका छौं । र, त्यही विकासको क्रममा हामीले गरेको गल्तीले नै यो कोरोना आएको हो ।’

अति सुक्ष्म कोरोनाले हतियारधारी देशलाई समेत आफ्नै खोरभित्र बस्न बाध्य बनाएको अभिनेता निखिलको भनाई छ । कोरोना फैलिनुको कारण मानिसले गरेको गल्तीको परिणाम रहेको बताउँदै उनी अगाडि भन्छन्, ‘हामी खोरमा बस्दा समेत चैनसँग बस्न सकेका छैनौं । हामी आफैंले कोरोनालाई जन्म दिएका हौं । हामीले गल्ती नै गरिसकेका छौं भने अब सयंमताका साथ बसौंन ।’

‘हामीलाई थाहा छ कि कोरोनाले नराम्रोसँग गस्रित पार्छ । मृत्युसम्म पुर्‍याउन सक्छ र एकबाट अर्कोमा सजिलै सर्छ । घरबाट बाहिर निस्कँदा पुलिसले लाठी चार्ज गर्छ भन्ने पनि थाहा छ । तर, हामीभित्रको कुन शक्ति हो जसले हामीलाई घरभित्र चैनसँग बस्न दिँदैन । हामीलाई रोडमै निस्कन मन लाग्छ,’ उनी मानिसभित्र हुने शक्तिले विकास र विनास दुवैमा लिएर जानसक्ने बताउँछन् ।

कोरोनाले मृत्यु हुने, परिवारमा सर्ने र सडकमा निस्किए पुलिसको कुटाइ खाने डर हुँदा-हुँदै पनि यसको मतलब नगरि रोडमा निस्कन गर्ने साहस अरु क्षेत्रमा लगाए जीवनको अर्को पाटो सुरु हुने उनी सुनाउँछन् । अभिनेता निखिल उप्रेती साँझको ५ बजेपछि कोरोनालाई चुनौती दिँदै ‘लकडाउन’ उल्लंघन गरेर सडकमा निस्कने मानिसको भीड राजनीतिक प्रभावको रुपमा लिन्छन् ।

उनी थप्छन्, ‘हामीमा राजनीतिको गहिरो प्रभाव छ । यो देशमा राजनीतिक स्वार्थका लागि धेरैपटक नेपाल बन्द भयो । तर, यो लकडाउन कुनै राजनीतिक स्वार्थका लागि होइन । कोरोनालाई थाहा छैन कि ५ बजेपछि सर्नु हुँदैन भन्ने । हामीमा कतिसम्म राजनीतिक प्रभाव छ भने ५ बजेपछि सडकमा निस्किहाल्छौं ।’ यो अवस्थामा यी सबै कुराबाट टाढा रहन उनको सुझाव छ ।

प्रतिक्रिया दिनुहोस्
About Thuloparda

Thuloparda Media Pvt. Ltd.

Reg No.: 160/073-74 (Suchana Vibhag, Nepal)

Publisher: Jiwan Kumar Parajuli

Editor: Bharatmani Regmi

Phone: 9851194755

Address: Anamnagar, Kathmandu, Nepal

Email: [email protected]

All the photos & other materials, do not use or reproduce without authorized permission.

Designed by Appharu