यस्तो छ राष्ट्रकवि घिमिरेको अन्तिम गीत



मंगलवार साँझ १०१ वर्षको उमेरमा दिवंगत भएका राष्ट्रकवि माधवप्रसाद घिमिरेले आफ्नो निधनपछि मात्रै सार्वजनिक गर्न भनेर रेकर्ड गराएको ‘त्यसरी होओस् मरण…’ बोलको श्रव्य सामग्री प्राप्त भएको छ । घिमिरेले उक्त गीत आफ्नो निधनपछि परिवारले सुन्न र सबै सञ्चारमाध्यमलाई उपलब्ध गराउन आग्रह गरेका थिए ।

स्वर्गीय घिमिरेकी छोरी शान्ति अधिकारीको परिकल्पना र संगीतमा धेरै अगाडि यो गीत रेकर्ड गरिएको थियो । गीतमा कर्ण दासको स्वर छ । २०१६ असोज १ गते लेखिएको यो गीत घिमिरेको ‘किन्नर-किन्नरी’ पुस्तकमा प्रकाशित छ । यो गीत संगीतबद्ध गरेर आफ्नो मृत्युपछि बजाइयोस् भन्ने राष्ट्रकविको अन्तिम इच्छा थियो ।

गीत यस्तो छ :-

त्यसरी होओस् मरण

जसरी सुत्छन् तारमा गीतका चारु चरण

हिमालचुली देशमा, दिनको शान्त भेषमा

जसरी गर्छन् विश्राम, सूर्यका स्वर्ण किरण

त्यसरी होओस् मरण ।।

सुन्दर सृष्टि निहारी, सुखैले चिम्लूँ नयन

विहानीपख रातको, कुसुम पारिजातको

जसरी जान्छ झरेर, भुइँमा विनापवन

त्यसरी होओस् मरण ।।

मुटुमा चोट नपरी, टुटेर जाओस् बन्धन

बादलको सेतो रासमा, दुइटा मूर्ति पासमा

जसरी शिर नुहाई, आफैंमा हुन्छन् अर्पण

त्यसरी होओस् मरण ।।

अमरापुरी सभामा आफैंलाई गरूँ वरण

त्यसरी होओस् मरण ।।

……………………………………………………

गीतकार- कविवर माधवप्रसाद घिमिरे

संगीत परिकल्पना- शान्ति अधिकारी

संगीत कम्पोजर तथा एरेन्जर- आशिष अविरल

गायक- कर्ण दास

बाँसुरी- गोपाल घटानी

डम्फू, मादल र तबला- भुवन गन्धर्व

सारंगी- हेमन्त कान्छा रसाइली

गितार- सञ्जीब बराइली

बेस गितार- अनुप दास

भायोलिन समूह- नोर्बू छिरिङ आप्पा, मोहनकृष्ण कार्की दली, गणेश परियार, मनोहर सुनाम र रविन कार्की दली

रेकर्डिङ, मिक्सिङ र मास्टरिङ- एचबिएन किस्मत

विशेष धन्यवाद- आनन्दराज खनाल

निर्माता- शान्ति शर्मा अधिकारी, अशेषकान्त शर्मा र मन्दिरा ढुंगेल

रेकर्डिङ स्टुडियो- राग रेकर्डस्

प्रतिक्रिया दिनुहोस्
About Thuloparda

Thuloparda Media Pvt. Ltd.

Reg No.: 160/073-74 (Suchana Vibhag, Nepal)

Publisher: Jiwan Kumar Parajuli

Editor: Subrat Raj Acharya

Phone: 9851194755

Address: Anamnagar, Kathmandu, Nepal

Email: [email protected]

All the photos & other materials, do not use or reproduce without authorized permission.

Designed by Appharu