भुवन केसी ‘एभरग्रिन फेसन आइकन’ अवार्डबाट सम्मानित



एक समय सर्वाधिक सफल चलचित्र दिएका चर्चित अभिनेता भुवन केसी उमेरले ६० वर्ष नाघिसकेका छन् । यो उमेरमा प्रायः व्यक्ति कुनै पनि पेशाबाट अवकास लिएर परिवारसँग समय विताउने गर्दछन् । तर, अभिनेता केसी आजका दिन पनि अभिनय र चलचित्र निर्माणमा सक्रिय छन् । उनले ‘ड्रिम्स’ बाट चलचित्र निर्देशनमा समेत हात हालिसकेका छन् ।

उमेरले ६० वर्ष नाघे पनि भुवन केसीले आफूलाई निकै फिट राखेका छन् । यसकारण पनि उनी सार्वजनिक कार्यक्रममा आफ्नो उमेर खुलाउँदैनन् । उमेरको प्रश्न आउँदा उनी रेडिमेड जवाफ फर्काउँछन्, ‘अनमोलभन्दा कान्छै हुँ ।’ उनलाई चलचित्रकर्मी तथा दर्शकहरुले ‘फेसन आइकन’ समेत भन्ने गरेका छन् । नेपाली चलचित्र क्षेत्रमा उनी जत्ति आकर्षक भएर हिँड्ने कमै कलाकार छन् ।

फेसनको मामलामा आफूलाई अरु कलाकारभन्दा भिन्न रुपमा प्रस्तुत गरेको भन्दै पेजेन्ट नेपाल इन्टरनेशनलले भुवन केसीलाई ‘एभरग्रिन फेसन आइकन’ अवार्डबाट सम्मानित गरेको छ । बिहीवार बालकुमारीमा एक कार्यक्रमका बीच उनलाई उक्त अवार्ड प्रदान गरिएको हो । पेजेन्ट नेपालका अध्यक्ष तथा अभिनेता दीक्पाल कार्कीले भुवन केसी यो अवार्डको हकदार रहेको बताए ।

अवार्ड ग्रहण गरेपछि अभिनेता भुवन केसीले यो अवार्डले आफूलाई अत्यन्त हर्षित र थप उत्साहित बनाएको बताए । त्यस्तै, उक्त कार्यक्रममा अभिनेत्री रीमा विश्वकर्मालाई ‘मोस्ट इनफ्लुएन्सेस टिभी आइकन’ अवार्ड प्रदान गरिएको थियो । गत वर्ष पेजेन्ट नेपाल इन्टरनेशनलले ‘फेसन आइकन’ को अवार्ड अभिनेत्री करिश्मा मानन्धर र अभिनेता प्रशान्त ताम्राकारलाई प्रदान गरेको थियो ।

प्रतिक्रिया दिनुहोस्
About Thuloparda

Thuloparda Media Pvt. Ltd.

Reg No.: 160/073-74 (Suchana Vibhag, Nepal)

Publisher: Jiwan Kumar Parajuli

Editor: Subrat Raj Acharya

Phone: 9851194755

Address: Anamnagar, Kathmandu, Nepal

Email: [email protected]

All the photos & other materials, do not use or reproduce without authorized permission.

Designed by Appharu