ठुलोपर्दा डटकम, काठमाण्डौ।
केहि महिना अगाडी काठमाडौंमा एक भब्य कार्यक्रमको आयोजना गरि एक साथ सात चलचित्रको निर्माण गर्ने घोषणा गरेको गोपिकृष्ण मुभिजले मंगलवार आफ्नो तेस्रो प्रोजेक्टको निर्माण घोषणा गरेको छ । यस अघि ‘होमवर्क’ र ‘ठमेल डटकम’को निर्माण घोषणा गरेको गोपिकृष्णले मंगलबार राजधानीमा एक कार्यक्रमको आयोजना गरि तेस्रो चलचित्र ‘यो पागल मन’को निर्माण घोषणा गरेको छ ।
चलचित्र ‘यो पागल मन’को गोपिकृष्ण मुभिजका अध्यक्ष उद्धव पौडेल र निर्माता संघका अध्यक्ष राजकुमार राईले संयूक्त रुपमा औपचारिक शुभारम्भ गरेका थिए । चलचित्रको औपचारिक शुभारम्भ कार्यक्रममा बोल्दै उद्धव पौडेलले चलचित्र ‘यो पागल मन’ उत्कृष्ट बनाउने दाबी गरे । लभस्टोरी कथामा निर्माण हुन लागेको यस चलचित्रको छायांकन भने बैशाख १५ गतेबाट सुरु हुने बताइएको छ । चलचित्रमा गौरी मल्ल,बर्षा सिवाकोटी, सगुन शाही, विनोद न्यौपाने, दिपक अधिकारी लगायतका कलाकारहरुले अभिनय गर्नेछन् भने चलचित्रलाई कल्याण अधिकारीले निर्देशन गर्नेछन् ।
चलचित्र ‘यो पागल मन’मा समावेश हुने गीतहरुमा अर्जुन पोखरेलको संगीत रहने छ भने गायक राजेश पायल राईको आवाज समावेश हुनेछ । राजेश सहित स्वरुपराज आचार्य, अञ्जु पन्त, दुर्गा खरेल र भुवन प्यासीको स्वर रहनेछ । चलचित्रलाई शम्भु सापकोटाले खिच्नेछन् । ‘यो पागल मन’ लाई चितवन, हेटौंडा र नारायणघाटमा खिचिने बताइएको छ । २०७२ सालमा ७ वटा चलचित्रको निर्माण गर्ने सुर कसेको गोपिकृष्णको दुई वटा चलचित्र अर्थात ‘होमवर्क’को यति बेला सम्पादन कार्य धमाधम सुरु भइरहेको छ भने अर्को चलचित्र ‘ठमेल डटकम’को छायांकन भइरहेको छ ।