नेपाली चलचित्र ‘पञ्चेबाजा’ को ट्रेलर रिलिज भएको छ । बुधवार काठमाण्डौको क्यूज हलमा आयोजना भएको कार्यक्रममा चलचित्रको ट्रेलर सार्वजनिक गरिएको हो । फागुन ११ गतेबाट देशव्यापी प्रदर्शनमा आउन लागेको नायक द्वय सौगात मल्ल र कर्मा शाक्य स्टारर यो चलचित्रको ट्रेलरमा एक्सन, लभ तथा बदलाको कथा पस्किएको छ ।
चलचित्र ‘लुट’, ‘लुट २’ र ‘लुकामारी’ मा एकसाथ काम गरेका सौगात र कर्मा पुनः एकसाथ देखिएका छन् । यो चलचित्रका निर्देशक घनश्याम लामिछाने हुन् । न्यू भेनस फिल्मस्को व्यानरमा निर्माण भएको ‘पञ्चेबाजा’मा राजेश शाहीको लगानी छ ।
फिल्ममा जस्मिन श्रेष्ठ, बुद्धि तामाङ, सिर्जना सुब्बा, प्रकाश घिमिरे, सबिन बास्तोला, प्रमिला तुलाचन, देशभक्त खनाल, युवराज भण्डारी, तेज गिरी, राजेश शाही लगायतका कलाकारहरुको पनि अभिनय छ ।
एक गाउँका तीन पात्रको कथा चलचित्रमा प्रस्तुत गरिएको निर्देशक लामिछानेले बताए । नायक सौगातले ‘पञ्चेबाजा’ आफूले गर्दै आइरहेको चलचित्रभन्दा फरक रहेको बताए ।
यस्तै, कर्माले कथावस्तु मन परेका कारण चलचित्रमा काम गरेको बताउँदै चाँडै रियलमा पनि पञ्चेबाजा बजाउने सोच रहेको खुलाए ।
सारा गुरुङ सह(निर्माता रहेको चलचित्रमा कालीप्रसाद बास्कोटा र विकास चौधरीको संगीत, दीर्घ खड्काको सम्पादन, प्रदिप भारद्वाजको लेखन, जेसन कुँवरको पार्श्व ध्वनि, उत्तम न्यौपानेको मिक्सिङ र हरि घले लामाको छायांकन छ ।
भिडियो :-