चैत २३ गतेबाट देशव्यापी प्रदर्शनमा आउन लागेको चलचित्र ‘तिमीसँग’ को प्रचार प्रसारका लागि शनिवार चितवन पुगेकी अभिनेत्री साम्राज्ञी राज्यलक्ष्मी शाहले आफू भएकै कारण चलचित्र हिट नहुने बताएकी छिन् ।
पत्रकारको एक प्रश्नमा उनले भनिन्, ‘म भएकै कारण चलचित्र हिट हुने भन्ने हुँदै होइन । सबैको काम राम्रो भए चलचित्र सफल हुने हो । नाजिर र आकाश दुबैलाई ‘तिमीसँग’ ट्रेलर र गीतमा धेरै राम्रो कमेन्ट आएको छ । हामीले चलचित्र एकदमै राम्रो बनाउने प्रयास गरेका छौं ।’
शिशिर राणा निर्देशित यस चलचित्रमा नाजिर हुसेन र आकाश श्रेष्ठको पनि प्रमुख भूमिका छ ।
साम्राज्ञीले आफूलाई नाजिरसँग पहिलोदेखि नै काम गर्ने खुब इच्छा रहेको र त्यो ‘तिमीसँग’ बाट पूरा भएको बताइन् । उनी भन्छिन्, ‘यो एउटा ट्राभल लभस्टोरी हो । ट्राभल गर्दा धेरै नयाँ मान्छेसँग भेट हुन्छ । त्यही विचको उचारचढावको कथा हो ‘तिमीसँग’ ।’
अभिनेता नाजिरले चलचित्रमा आफूले नवलपरासीको भरतराज मिश्र भन्ने एक युवकको भूमिका निर्वाहा गरेको बताए । उनी भन्छन्, ‘तराईको फाँटदेखि पहाड हुँदै हामी हिमालसम्म पुगेका छौं । चलचित्रमा तीन नयाँ यात्रीको कथा छ, जसलाई एकअर्काको विषयमा केही थाहा हुँदैन । विस्तारै चिनजान हुँदै प्रेम, विछोडको कथा फिल्मले वाचन गरेको छ । चलचित्रमा स्ट्यान्डर कमेडी छ ।’
अर्का अभिनेता आकाश ‘तिमीसँग’ राम्रो चलचित्र बनेको बताउँछन् । हामीले निकै मिहिनेत गरेर बनाएको चलचित्र हो यो । दर्शकले हेरुन्जेल मनोरञ्जन लिनुहुन्छ ।’ उनी भन्छन् ।
यस्तै, निर्देशक शिशिरले टेक्निसियन हुँदै कलाकारसम्मको सम्पूर्ण अनुभव मिसाएर आफूले परिवार सबैले हेर्न मिल्ने त्रिकोणात्मक चलचित्र बनाएको बताए ।
चलचित्रमा रोशन भट्टराईको एक्सन, कविराज गहतराज र रामजी लामिछानेको कोरियोग्राफी र सुशिल क्षेत्रीको छायांकन छ । शिशिर राणा, साकार ओझा, समुन्द्र उप्रेती र सुशिल क्षेत्रीको पटकथा चलचित्रमा छ ।