सामाजिक सञ्जालमा ‘तरकारीवाली’ को रुपमा चर्चित बनेकी गोरखाकी कुसुम श्रेष्ठलाई हाल दोस्रो सातामा प्रदर्शनरत चलचित्र ‘लम्फू’ युनिटको सहयोगमा तथा काठमाडौंको मेगा कलेजको सहकार्यमा स्नातकोत्तर तहसम्म निःशुल्क छात्रवृत्ति दिइएको छ ।
हाल कुशुम १२ कक्षाको परिक्षा दिएर बसिरहेकी छिन् । उनले आइतवार बबरमहलमा रहेको मेगा कलेज पुगेर कलेज व्यवस्थापनसँग छलफल र कलेजको अवलोकन गरेकी छन् । उनीसँग ‘लम्फू’ का निर्माता शक्तिबल्दभ घोरासैनी, निर्देशक गोपालचन्द्र लामिछाने र अभिनेता सञ्जित भण्डारी पनि साथमा थिए ।
यसअघि चितवनको रत्ननगरस्थित क्विस्ट मोडलसँगको सहकार्यमा ‘लम्फू’ निर्माण कम्पनी पपुलर मल्टिमीडिया प्रा.ली.ले कक्षा ११ र १२ का लागि छात्रवृति प्रदान गरेको थियो । अब कुशुमले डिग्रीसम्मको अध्ययन मेगा कलेजमा गर्नेछन् ।
निर्माता शक्तिबल्दभ घोरासैनीले आफूहरुले गरेको वाचा अब पूरा गरेको बताए । उनले भने, ‘कुशुमको तश्बिर भाइरल भएपछि हामीले उनलाई अध्ययनमा सहयोग गर्ने जुन वाचा गरेका थियौं अब त्यो पूरा गरेका छौं । हामीले अब मेगा कलेजलाई कुशुमको बाँकी अध्ययनको अभिभारा सुम्पिएका छौं ।’
तरकारीवाली कुशुमलाई कलेजका अध्यक्षसहित शिक्षकहरुले स्वागत गर्दै कलेजको भम्रण गराएका छन् । कुशुमले मेगा कलेजमा अध्ययन गर्न पाउँदा अत्यन्त खुसी भएको बताइन् । उनले भनिन्, ‘अहिले मेरो प्राथमिकता भनेकै अध्ययन हो । राम्रो कलेजमा पढ्न पाउँदैछु । उच्च शिक्षा प्राप्त गर्न निरन्तर मेहनत गर्नेछु ।’
‘लम्फू’ का निर्देशक लामिछाने र अभिनेता भण्डारीले तरकारीवालीलाई डिग्रीसम्मको अध्ययन नि:शुल्क गर्न सहयोग गरेकोमा कलेज व्यवस्थापनलाई धन्यवाद दिए । कुशुमले हाल प्रदर्शनरत चलचित्र ‘लम्फू’ मा पनि अभिनय गरेकी छिन् ।