दर्शकको नाडी छामेर लभस्टोरी चलचित्र बनाउन सिपालु मानिने सुदर्शन थापा निर्देशित चलचित्र ‘म यस्तो गीत गाउँछु २’ को दोस्रो गीत सार्वजनिक भएको छ । ‘तिम्रो घरको वरिपरि’ बोलको गीतले सकारात्मक प्रतिक्रिया बटुल्दै गर्दा निर्माण टिमले बिहीबार ‘दुःखको काँडा’ बोलको रोमान्टिक गीत सार्वजनिक गरेको हो ।
गीतको भिडियोमा अभिनेता पल शाह र अभिनेत्री पूजा शर्मा फिचर्ड छन् । अहिलेका चल्तीका संगीतकार अर्जुन पोखरेलको संगीत रहेको गीतमा देवल भण्डारीको शब्द र सनिष श्रेष्ठको स्वर छ । रामजी लामिछानेको कोरियोग्राफी रहेको गीतको अडियो र भिडियो दुबै सशक्त छ । पल र पूजाको केमेस्ट्री पनि सुहाएको देखिन्छ ।
गीतको भिडियोलाई आकर्षक बनाउन निर्माण टिमले ठूलो रकम खर्च गरेर काठमाडौंको त्रिपुरेश्वरमा कृतिम हिउँ नै पारेको छ । फागुन २३ गतेबाट प्रदर्शनमा आउने ‘म यस्तो गीत गाउँछु २’ मा पल र पूजाका अलावा हरिहर शर्मा, दिनेश डिसी, राजा राजेन्द्र पोखरेल, सोनिका रोकायलगायतका कलाकारहरुको अभिनय छ ।
शिवम अधिकारी र दिनेश न्यौपानेले चलचित्रको कथा लेखेका हुन् । पूजा र सुदर्शन फिल्मका निर्माता हुन् । बनिष शाह र मिलन श्रेष्ठको सम्पादन रहेको चलचित्र सौरभ लामाले खिचेका हुन् । दुई वर्ष अगाडिको सुपरहिट चलचित्र ‘म यस्तो गीत गाउँछु’ को सिक्वेल भएका कारण यो चलचित्रले बक्सअफिसमा आक्रामक व्यापार गर्ने अनुमान गरिएको छ ।
गीत हेर्नुहोस् :-