काठमाडौं – नेपाली रजतपटका दिग्गज सिनेकर्मी नीर शाहको करिब एक दशकपछिको निर्देशकीय पुनरागमन रहेको बहुप्रतिक्षित चलचित्र ‘कमला मिस’को आधिकारिक टिजर सार्वजनिक भएको छ। आगामी साउन २२ गतेदेखि देशभरका सिनेमाघरहरूमा प्रदर्शनको तयारीमा रहेको यस चलचित्रको झन्डै दुई मिनेट लामो टिजरले दर्शकलाई गहिरो भावनात्मक कथाको स्पष्ट सङ्केत दिएको छ। सार्वजनिक भिडियोले आमाबुबाको स्नेहबाट वञ्चित हुनुपर्दा एउटा कलिलो बालकको मनोविज्ञानमा पर्ने गम्भीर असर र त्यसले उसको समग्र जीवनमा निम्त्याउने उतारचढावलाई निकै मार्मिक ढङ्गले प्रस्तुत गरेको छ।
विजय मल्ल स्मृति प्रतिष्ठानको ब्यानरमा उमा मल्लद्वारा निर्मित यस मनोवैज्ञानिक कथानक चलचित्रमा निर्देशक शाह स्वयंले मुख्य भूमिका निर्वाह गरेका छन्। उनीसँगै रमेश बुढाथोकी, बासना तिमल्सिना, शिवम सराफ क्षेत्री, आरभ दाहाल, भावना मगर, सुशान्त कुमार श्रेष्ठ, जयन्त रेग्मी, सुरेश थापालगायतका कलाकारहरूको जीवन्त अभिनय यसमा देख्न सकिन्छ। चलचित्रमा उमेश मल्ल र चैतन्य प्रधानले कार्यकारी निर्माताको बलियो जिम्मेवारी सम्हालेका छन्।
स्वर्गीय प्रख्यात साहित्यकार विजय मल्लको मूल कथामा आधारित ‘कमला मिस’को पटकथा तथा संवाद लेखनमा निर्देशक शाहलाई प्रजल दुलाल र सुगम दुलालले सघाएका छन्। शिवराम श्रेष्ठको उत्कृष्ट छायांकन रहेको यस चलचित्रमा युग भुसालले सङ्गीत भरेका छन्।
सन् २०१५ मा साहित्यकार डायमनशमशेर राणाको कृतिमा आधारित ऐतिहासिक चलचित्र ‘सेतो बाघ’ निर्देशन गरेयता विश्राम लिएका शाहको यो लामो अन्तरालपछिको सानदार कमब्याक हो। विगतमा ‘वासुदेव’, ‘पच्चीस वसन्त’, ‘राजमती’, ‘वसन्ती’ र ‘मसान’ जस्ता कालजयी तथा ऐतिहासिक चलचित्र निर्देशन गरेर नेपाली सिनेमामा अमिट छाप छोडेका शाहको यो नयाँ सिर्जनालाई दर्शक तथा सिनेवृत्तमा निकै चासोका साथ हेरिएको छ।