मिस नेपाल हुँदैमा चलचित्र पाइँदैन : निकिता चाण्डक

सन् २०१७ की मिस नेपाल निकिता चाण्डकले चलचित्र ‘साङ्लो’ बाट अभिनयमा डेब्यू गर्दैछिन् । चलचित्रमा उनको जोडी एक्सन स्टार विराज भट्टसँग बाँधिएको छ । चलचित्रका निर्देशक पनि उनी नै हुन् । यही माघ २४ गतेबाट प्रदर्शनमा आउन लागेको यो चलचित्रकी निकिता सोलो अभिनेत्री हुन् । यसकारण उनको भूमिकाले चलचित्रमा विशेष अर्थ राख्ने अनुमान गरिएको छ ।

तर, ट्रेलरमा उनले पाएको ‘स्क्रिन स्पेश’ हेर्दा चलचित्रमा उनी ‘सो पिस’ मा सीमित भएको हुनसक्ने देखिन्छ । यस विषयमा अभिनेता विराज भन्छन्, ‘चलचित्र हेरेपछि दर्शकले निकिताको तारिफ गर्नेछन् । ट्रेलरमा धेरै कलाकारको बीचमा उसलाई मैले कमै स्पेश दिएको छु । तर, चलचित्रमा उसको बलियो क्यारेक्टर छ ।’ उनी चलचित्रमा निकिताको काम पहिलो जस्तो नलाग्ने बताउँछन् ।

नेपाली चलचित्रमा अभिनेत्रीको रुपमा आफ्नो पहिचान बनाउन लागेकी निकिताले आफू मिस नेपाल भएपछि अभिनेत्री बन्ने सोच नबनाएको बताइन् । एक भेटमा उनले भनिन्, ‘मिस नेपाल बनेपछि अभिनय गर्ने सोच बनाएको होइन । मलाई पहिल्यदेखि नै अभिनयमा रुचि थियो । बरु, मिस नेपालमा सहभागी हुन्छु भनेर चाहिँ कहिल्यै सोचेको थिइनँ । यो चाहिँ अचानक जस्तै भयो ।’

मिस नेपालको उपाधि जितेपछि चलचित्रमा प्रवेश गर्न बाटो खुल्छ भन्ने सोचाइ धेरैमा छ । तर, मिस नेपाल हुँदैमा चलचित्र नपाइने तर्क निकिता राख्छिन् । उनले अगाडि भनिन्, ‘मिस नेपालको उपाधि जितेपछि एक हदसम्म चलचित्रमा प्रवेश गर्न सजिलो चाहिँ हुन्छ । तर, चलचित्र पाउनु मात्र ठूलो कुरा होइन । तपाईंमा प्रतिभा नै छैन भने जुन प्रतियोगिताको टाइटल जिते पनि अर्थ छैन ।’

नेपाली चलचित्रमा असफल मिस नेपालको भीडमा अपबाद बन्छु जस्तो लाग्छ ? पत्रकारको प्रश्नमा निकिताले भनिन्, ‘म ठूलो स्टार बन्छु भनेर चलचित्रमा आएको होइन । पहिल्यैदेखि अभिनयमा रुचि भएका कारण अभिनयमा होमिएको हुँ । दर्शकले मेरो काम रुचाइदिनुभयो भने त्यही नै मेरो लागि ठूलो सफलता हुनेछ ।’ दर्शकले आफ्नो काम रुचाउनेमा उनी विश्वस्त छिन् ।