यही फागुन ३० गतेबाट प्रदर्शनमा आउन लागेको यस वर्षको बहुप्रतिक्षीत चलचित्रमध्ये एक ‘म यस्तो गीत गाउँछु २’ लाई कथा चोरीको आरोप लागेको छ । बलिउड चलचित्र ‘आशिकी २’ को नेपाली भर्सन भन्दै अहिले सामाजिक सञ्जालमा फिल्मको आलोचना भैरहेको छ । बिहीवार सार्वजनिक भएको चलचित्रको ट्रेलरमा १० प्रतिशत कमेन्ट ‘आशिकी २’ बाट हुबहु कथा चोरिएको भन्ने छ ।
‘आशिकी २’ र ‘म यस्तो गीत गाउँछु २’ को ट्रेलर हेर्दा कथाको प्लटमा परिस्थिति मिल्दोजुल्दो छ । ‘आशिकी २’ मा आदित्य रोय कपूर चर्चित गायक हुन्छन् । उनको भेट श्रद्धा कपूरसँग हुन्छ । श्रद्धाको स्वर राम्रो हुन्छ । उनी एक रेस्टराँमा जीविको पार्जनका लागि गायिकाको रुपमा काम गरिरहेकी हुन्छिन् । उनको स्वर दुनियाँमाझ पुर्याउन आदित्यले गर्ने संघर्षमा चलचित्र घुमेको छ ।
‘म यस्तो गीत गाउँछु २’ को ट्रेलर ‘आशिकी २’ भन्दा भिन्न लाग्दैन । ट्रेलरमा देखाइए अनुसार, सुदर्शन थापा निर्देशित चलचित्रमा पल विक्रम शाह चर्चित गायक हुन्छन् । उनको गायनको ठूलो फ्यान हुन्छिन्, छाँया उर्फ पूजा शर्मा । उनको पनि गायनमा रुचि छ । तर, अवसर पाएकी हुन्नन् । छाँयासँग भेट भएपछि पलले उनलाई गायिका बनाउन आफ्नो स्टारडम नै दाउमा राख्छन् ।
‘म यस्तो गीत गाउँछु २’ को कथाको प्लट हेर्दा ‘आशिकी २’ सँग मिल्दोजुल्दो देखिन्छ । तर, ‘म यस्तो गीत गाउँछु २’ का लेखक शिवम् अधिकारीले म्यूजिकल लभस्टोरी भएका कारण ‘आशिकी २’ फ्लेवर लागेको हुनसक्ने बताएका छन् । उनले फेसबुकमा स्टाटस लेख्दै ‘आशिकी २’ बाट कथा चोरिएको प्रमाणित भए आफू नेपाली चलचित्रबाटै सन्यास लिने पनि घोषणा गरेका छन् ।
निर्देशक सुदर्शन थापाले भने चलचित्रलाई चोरीको आरोप लगाउन एउटा समुह नै लागिपरेको दाबी गरेका छन् । त्यस्तै, अभिनेत्री पूजा शर्माले सबै म्यूजिकल लभस्टोरी चलचित्रलाई ‘आशिकी २’ सँग मिल्यो भनेर टिप्पणी गर्नु गलत रहेको बताएकी छन् । ३ मिनेटको ट्रेलर हेरेर चलचित्रको टिप्पणी नगर्न उनको आग्रह छ । उनले दर्शकलाई चलचित्र हेरेपछि टिप्पणी गर्न आग्रह गरेकी छन् ।