पल, पूजा र सुदर्शनलाई मनपर्‍यो ‘आमा

शुक्रवारबाट प्रदर्शनमा आएको दीपेन्द्र के. खनाल निर्देशित चलचित्र ‘आमा’ यही फागुन ३० गतेबाट प्रदर्शनमा आउन लागेको चलचित्र ‘म यस्तो गीत गाउँछु २’ टिमले राजधानीको कुमारी हलमा पुगेर हेरेको छ । निर्देशक सुदर्शन थापा, अभिनेत्री पूजा शर्मा र अभिनेता पल शाहले एकसाथ चलचित्र हेरेका हुन् । उनीहरुलाई चलचित्र निकै मन परेको छ । र, दर्शकलाई हेरिदिन आग्रह गरेका छन् ।

चलचित्र हेरेपछि निर्देशक थापा भावुक हुँदै निस्किएका थिए । उनले चलचित्र हेरुन्जेल आँशु थामे पनि बाहिर निस्कँदा अभिनेत्री सुरक्षा पन्तलाई देखेपछि आँशु थाम्न नसकेको बताए । उनले सञ्चारकर्मीसँग कुराकानी गर्दै निर्देशक खनालको तारिफमा भने- ‘यस्तो विषयमा जो कोहीले चलचित्र बनाउने हिम्मत नै गर्दैन । म आफैं पनि यस्तो विषयमा चलचित्र बनाउने हिम्मत गर्न सक्दिनँ ।’

‘आमा’, निर्देशक खनाल र चलचित्रकर्मीको मात्र नभएर हरेक घरको चलचित्र रहेको उनको भनाई छ । उनले यो चलचित्र नछुटाइ हेरिदिन दर्शकलाई आग्रह गरे । अभिनेत्री पूजा शर्मालाई पनि चलचित्रले निकै छोएछ । उनले दुवै हात जोडेर सबै दर्शकलाई चलचित्र हेरिदिन आग्रह गरिन् । ‘म पहिलो पटक कुनै चलचित्र हेरेपछि हात जोडेर भन्दैछु, यो चलचित्र सबैले हेरिदिनुहोला,’ उनले भनिन् ।

‘हरेक व्यक्तिले हेर्नुपर्ने चलचित्र हो यो । चलचित्रमा देखाइएको हस्पिटलले दिने दुःख मैले पनि भोगेको छु । यदी तपाईंहरुलाई यो थाहा छैन भने आफू जोगिनका लागि पनि ‘आमा’ हेर्नुहोला,’ अभिनेत्री पूजाले अगाडि थपिन्, ‘चलचित्रमा केही कुरा पनि फेक छैन । एकदमै सत्य घटनामा चलचित्र बनेको छ ।’ उनले अभिनेत्री सुरक्षाको अभिनयको प्रशंसा गर्न आफूसँग शब्द नभएको बताइन् ।

त्यस्तै, अभिनेता पल शाहले चलचित्र निकै मर्मस्पर्शी बनेको बताए । चलचित्रमा आफूलाई रिलेट गरेको बताउँदै उनले भने, ‘मध्यमवर्गीय परिवारमा आउने समस्या, हस्पिटलभित्र हुने लुट, आमा र छोरीको सम्बन्धलाई चलचित्रमा निकै मनछुने ढंगबाट देखाइएको छ । चलचित्र मलाई साह्रै मनपर्‍यो ।’ ‘आमा’ मा सुरक्षा पन्त र मिथिला शर्मा आमा-छोरीको भूमिकामा छन् ।