कोरोना भाइरसको त्रासका कारण सिनेमा हलमा दर्शकको उपस्थिति पातलिँदै गएको अवस्थामा शुक्रवारबाट चौथो हप्तामा प्रवेश गरेको चलचित्र ‘आमा’ ले आफ्नो लगानी सुरक्षित गरेको निर्माण कम्पनीले एक विज्ञप्ती जारी गर्दै जनाएको छ । डिएस डिजिटलद्वारा जारी विज्ञप्तीमा भनिएको छ, ‘चौथो हप्तासम्म आइपुग्दा चलचित्रले नेपालबाट लगानी सुरक्षित गरी मुनाफा समेत आर्जन गर्न सफल भैसकेको छ ।’
निर्मात्री शर्मिला पाण्डेद्वारा हस्ताक्षरित विज्ञप्तीमा अगाडि भनिएको छ–‘चलचित्रलाई देश तथा विदेशबाट प्राप्त भएको स्नेह र मायाको लागि सम्पूर्ण दर्शक, प्रदर्शक, वितरक, पत्रकार तथा समिक्षकहरुलाई धन्यवाद व्यक्त गर्न चाहन्छौं ।’ कोरोनाको त्रासबीच पनि हलसम्म पुगेर चलचित्र हेर्ने दर्शकलाई निर्माणपक्षले धन्यवाद दिएको छ । चलचित्रको कमाईबाट निर्माण टिम सन्तुष्ट छ ।
चलचित्रमा सुरक्षा पन्त, मिथिला शर्मा, सरिता गिरी, देशभक्त खनाल, मनिष निरौला, टिका पहारीलगायतका कलाकारहरुको अभिनय छ । यो चलचित्रको अधिकांश दृश्य दर्के झरीमा खिचिएको हो । ‘आमा’ हेरेपछि समीक्षकले निर्देशक दीपेन्द्र के. खनाललाई दर्शक रुवाउने लाइसेन्स प्राप्त निर्देशनको ट्याग दिएका छन् । भने, दर्शकले चलचित्रलाई ‘मास्टरपिस’ भन्दै प्रशंसा गरेका छन् ।