गएको केही हप्तायता नेपाली चलचित्रकर्मीको अभिव्यक्ति र अन्तर्वार्तालाई लिएर सामाजिक सञ्जालमा भइरहेको गाली गलौजप्रति नेपाली चलचित्रसँग सम्बन्धित सात संस्थाले गम्भीर ध्यानाकर्षण भएको जनाएका छन् । सोमवार एक संंयुक्त वक्तव्य जारी गर्दै कुनै पक्षबाट अशिष्टताको पराकाष्ट नाघे कानुनी उपचार खोज्ने उनीहरुको चेतावनी छ ।
अहिलेको अवस्थामा कसैको अभिव्यक्तिको टिप्पणीलाई लिएर सिंगो चलचित्र क्षेत्र अफवाहपूर्ण कुतर्क र एकअर्काको मानमर्दनमा तरंगित हुनु दुःखपूर्ण रहेको विज्ञप्तीमा उल्लेख छ । दर्शकको नाममा र लोकप्रियताको नाममा एकअर्कालाई गाली गलौज गर्नु र अशिष्टता प्रदर्शन गर्नु न्यायोचित नभएको र कसैले शिष्टताको सीमा नाघे कानुनी उपचार खोज्न बाध्य हुने विज्ञप्तीमा भनिएको छ ।
‘वर्तमान सन्दर्भमा सामाजिक सञ्जालमा चलचित्रकर्मीमाथि लक्षित गरि गाली गलौज र अश्लिल प्रतिक्रिया आएकोप्रति हामी संवेदनशिल भएका छौं । यस प्रकारको प्रतिक्रिया नरोकिएमा यो प्रतिक्रिया नेपालबाट आएको भए नेपालको साइबर क्राइम कानुन अनुसार र विदेशबाट आएको भए परराष्ट्र मन्त्रालयमार्फत् कारबाहीको प्रक्रिया अगाडि बढाइनेछ’, विज्ञप्तीमा भनिएको छ ।
नेपाल चलचित्र संघ, नेपाल चलचित्र कलाकार संघ, नेपाल चलचित्र निर्माता संघ, नेपाल चलचित्र प्राविधिक संघ, नेपाल चलचित्र द्वन्द्व संघ, नेपाल चलचित्र निर्देशक समाज र नेपाल चलचित्र नृत्य संघले जारी गरेको संयुक्त वक्तव्यमा सम्पूर्ण चलचित्रकर्मीहरुले आ-आफ्नो पेशागत संस्थाको उद्येश्य, आचारसंहिता र अनुशासनको परिधिभित्र रहेर काम गर्न पनि आह्वान गरिएको छ ।