काठमाडौं – नेपाली चलचित्र ‘द महावीर’को निर्माण घोषणा गरिएको छ । आइतबार निर्माण टोलीले एक रहस्यमय थिम पोस्टर सार्वजनिक गर्दै चलचित्रको निर्माण आरम्भ भएको जानकारी गराएको हो । ‘उठ, लड र जित’ नारासहितको पोस्टरले युद्धको परिवेशको सङ्केत दिएको छ । रातो र कालो रङ्गको संयोजनमा तयार पारिएको पोस्टरमा दुई शक्तिशाली घोडामा सवार योद्धा आमेन-सामने भएको देखाइएको छ । बीचमा रगतले लतपतिएको तरबारले युद्धको भयावहतालाई चित्रण गर्दछ ।
यस चलचित्रलाई यसअघि विभिन्न म्युजिक भिडियोहरू निर्देशनको अनुभव भएका जिबी आग्रीले निर्देशन गर्नेछन् । गायक समेत रहेका कृष्ण बिक र निर्देशक आग्रीले यसको स्क्रिप्ट तयार पारेका हुन् । यसमा वरिष्ठ सङ्गीतकार सुरेश अधिकारीले कार्यकारी निर्माताको भूमिका निर्वाह गर्ने भएका छन् । चलचित्र लक्षरा फिल्सको ब्यानरमा निर्माण हुनेछ, जसमा कृष्ण बिक, बिआर रेड्डी र सन्तोष लुहार निर्माताको रूपमा रहेका छन् भने रम्भा देवी र लक्ष्मण बिक सह निर्माता हुन् ।
नेपाली र हिन्दी भाषामा निर्माण हुने यो चलचित्रको छायाङ्कन शरण ऋषिले गर्नेछन् । चलचित्रमा अभिनय रहने कलाकारहरूका बारेमा भने खुलासा भएको छैन ।