काठमाडौं – ब्लकबस्टर चलचित्र ‘बोक्सीको घर’मार्फत नेपाली बक्स अफिसमा ऐतिहासिक रेकर्ड राख्न सफल अभिनेत्री तथा निर्मात्री केकी अधिकारीले आफ्नो आगामी प्रोजेक्ट ‘स्टेशन’को निर्माण कार्य औपचारिक रूपमा थालनी गरेकी छन्। सोमबार पवित्र पर्व अक्षय तृतीयाको विशेष साइत पार्दै ललितपुरको ऐतिहासिक बंगलामुखी मन्दिर परिसरमा यस चलचित्रको शुभमुहूर्त सम्पन्न गरिएको छ। उक्त धार्मिक तथा औपचारिक समारोहमा चलचित्रका निर्देशक, निर्माता र प्राविधिक टोलीको उत्साहजनक उपस्थिति रहेको थियो।
यसअघि नयाँ वर्षको छेको पारेर निर्माण घोषणा गरिएको यस चलचित्रले सुरुवाती दिनदेखि नै दर्शकमाझ गहिरो कौतूहल सिर्जना गरिरहेको छ। घोषणाको समयमा सार्वजनिक गरिएको ‘थिम पोस्टर’मा चित्रित पुरानो काठको दराज र त्यसभित्र राखिएका रहस्यमय सामग्रीहरूले यो चलचित्र एक गम्भीर सोसल ड्रामामा आधारित हुने बलियो संकेत दिएका छन्।
वर्ष २०८१ को सर्वाधिक सफल सावित भएको ‘बोक्सीको घर’कै प्रभावशाली टिमलाई केकीले यसपटक ‘स्टेशन’मा पनि सँगै अगाडि बढाएकी छन्। ‘केकी अधिकारी फिल्मस’को प्रतिष्ठित ब्यानरमा निर्माण हुन लागेको यस प्रोजेक्टलाई सुलक्षण भारतीले निर्देशन गर्दैछन् भने यसको कथा पनि निर्देशक भारती स्वयम्ले नै तयार पारेका हुन्। यस चलचित्रको निर्माण पक्षको नेतृत्व भने बद्री अधिकारीले सम्हालेका छन्।
मुहूर्त सम्पन्न भएर निर्माण प्रक्रिया अघि बढे पनि ‘स्टेशन’को पर्दामा कुन-कुन कलाकारले मुख्य भूमिकामा जीवन्तता भर्नेछन् भन्ने विषयलाई निर्माण पक्षले अझैसम्म रहस्यकै गर्भमा राखेको छ। यस चलचित्रमा निर्मात्री केकी स्वयम्ले अभिनय गर्नेछिन् या पर्दापछाडि मात्र रहेर व्यवस्थापनको पाटो सम्हाल्नेछिन् भन्ने कुराले दर्शक र सञ्चारमाध्यममा थप प्रतीक्षा र चासो बढाएको छ। कलाकारहरूको नाम गोप्य राख्ने निर्माण टिमको यो रणनीतिले चलचित्रप्रतिको उत्सुकतालाई झनै उचाइमा पुर्याएको छ।
निर्माण पक्षले दिएको जानकारी अनुसार आगामी तेस्रो सातादेखि चलचित्रको छायांकन सुरु गरिने तयारी छ भने आउँदो भदौ १९ गतेलाई देशव्यापी प्रदर्शन मिति तय गरिएको छ। ‘बोक्सीको घर’ जस्तो गम्भीर र सामाजिक यथार्थ बोकेको विषयवस्तुलाई कलात्मक रूपमा प्रस्तुत गरेर दर्शकको अपार माया जितेकी केकीको यो नयाँ प्रोजेक्टलाई नेपाली सिने वृत्तमा निकै महत्व र प्रतीक्षाका साथ हेरिएको छ।