काठमाडौं – दीपेन्द्र के खनालद्वारा निर्देशित चलचित्र ‘के घर के डेरा : घर नं २’ को ट्रेलर सार्वजनिक भएको छ । शुक्रवार आयोजित एक कार्यक्रममा यो ट्रेलर देखाइएको हो ।
ट्रेलरमा घर र डेराको फरकपन देखाइएको छ । घरको मायाले निम्त्याउने समस्यालाई स्पष्ट रूपमा प्रस्तुत गरिएको छ । अहिलेको समाजमा घरलाई नै सबै थोक ठान्ने र प्रतिष्ठाको रूपमा लिने चलनलाई पनि ट्रेलरमा देखाइएको छ ।
युवा पुस्ताले घर जोगाउन र बनाउन गर्ने सङ्घर्ष र त्यसले ल्याउने नकारात्मक असरहरूलाई ट्रेलरले देखाउँछ । घरको मोहले गर्दा बिग्रिएको आर्थिक अवस्था र परिवारको अवस्थालाई ट्रेलरमा देखाइएको छ ।
‘पशुपतिप्रसाद’, ‘आमा’, र ‘चिसो मान्छे’ जस्ता सफल सामाजिक चलचित्र दिएका निर्देशक खनालको यो नयाँ चलचित्र ‘के घर के डेरा : घर नं २’ जेठ २ गतेबाट प्रदर्शनमा आउँदैछ । यसमा खगेन्द्र लामिछाने, आर्यन सिग्देल, निश्चल बस्नेत, केकी अधिकारी, उपासना सिंह ठकुरी लगायतको प्रमुख भूमिका रहेको छ ।
‘के घर के डेरा : घर नं २’ को कथा साहित्यकार बुद्धि सागरले लेखेका हुन् र यो उनको पहिलो चलचित्र लेखन हो ।
ट्रेलर: