काठमाडौं – अभिनेता टिका पहारी र अभिनेत्री रेजीना उप्रेतीलाई ‘हरितारा चलचित्र पुरस्कार’ प्रदान गरिएको छ । पहारीलाई २०८० सालको र उप्रेतीलाई २०८१ सालको पुरस्कार दिइएको हो । यो पुरस्कार काठमाडौंमा परिवर्तन नेपालले आयोजना गरेको कार्यक्रममा दिइएको हो । यो चलचित्र क्षेत्रको पहिलो पुरस्कार हो, जुन २०५२ सालमा स्थापना भएको थियो । पुरस्कारमा जनही २५ हजार रुपैयाँ दिइएको छ ।
त्यस्तै, चलचित्र पत्रकार विष्णु सुबेदीलाई २०८१ सालको ‘हरितारा चलचित्र पत्रकारिता पुरस्कार’ प्रदान गरिएको छ । यो पुरस्कारको राशि १० हजार रुपैयाँ छ ।
अन्य पुरस्कार र सम्मान पनि प्रदान गरियो । ‘श्री दुर्गादेवी पुण्य निरौला स्मृति पुरस्कार’ कलाकार तथा अधिवक्ता कृष्ण ढुङ्गाना र निर्देशक सम्झना उप्रेती रौनियारलाई दिइयो। यो पुरस्कारको राशि १० हजार रुपैयाँ छ ।
अभिनेता रवीन्द्र सिंह बानिया, निर्देशक अमर ओली, अभिनेता जेबी रुवाली, अभिनेता सविन श्रेष्ठ, अभिनेता गोपाल ढकाल (छन्दे) र अभिनेता सुनिल कटुवाललाई ‘परिवर्तन चलचित्रकर्मी विशेष सम्मान २०८१’ बाट सम्मानित गरियो । साथै, सञ्चारकर्मी तुलसी गिरी भावुक, कृष्ण भुसाल र कमला जोशीलाई ‘परिवर्तन चलचित्र पत्रकारिता सम्मान २०८१’ प्रदान गरियो ।
कार्यक्रममा बोल्दै परिवर्तन नेपालका अध्यक्ष मोहन निरौलाले पुरस्कृत र सम्मानित व्यक्तिहरूलाई बधाई दिए । चलचित्र विकास बोर्डका अध्यक्ष दिनेश डिसीले ‘हरितारा पुरस्कार’को महत्त्व बताए । वरिष्ठ अभिनेत्री वसुन्धरा भुसाल र अभिनेता टिका पहारीले पनि पुरस्कारको महत्वबारे बोलेका थिए ।
पुरस्कार छनोट समितिका सदस्यहरूमा मोहन निरौला, सुन्दर श्रेष्ठ र शान्तिप्रिय थिए । कार्यक्रम मायाङ्का राणा सिरोहियाको अध्यक्षतामा भएको थियो ।