अभिनयमा सघाउन निर्देशनको अनुभव लिँदै मनिष

काठमाडौं – अभिनेता मनिष राउतले आफूलाई ‘जनै हराएको मान्छे : सम्बन्धका धागाहरू’ नामक चलचित्रमा अभिनयको सट्टा सहयोगी निर्देशकको भूमिकामा प्रस्तुत गरेका छन् । भदौ ६ गतेबाट प्रदर्शनमा आउने यस चलचित्रमा उनलाई दर्शकले अभिनयमा नभई निर्देशन पक्षमा देख्न पाउनेछन् । ‘प्रेम गीत ३’ बाट चर्चामा आएका मनिषले निर्देशकको भूमिकामा काम गर्दा आफ्नो अभिनय यात्रामा थप मद्दत पुग्ने बताएका छन् ।

राउतका अनुसार निर्देशन पनि एक रचनात्मक कार्य हो र अभिनयसँगै निर्देशनको अनुभव बटुल्दा आफूलाई सहज हुने उनको विश्वास छ । “म पूरै निर्देशक त होइन, तर निर्देशकको कामको अनुभवले अभिनयलाई थप सहयोग पुग्छ भन्ने लाग्छ,” उनले भने । आफूलाई मन पर्ने कथा र बलियो टिम भएकाले ‘जनै हराएको मान्छे’ मा फरक विभागमा काम गर्न राजी भएको उनले स्पष्ट पारे ।

हरेक अभिनेताको निर्देशनमा काम गर्ने चाहना हुने बताउँदै मनिषले भविष्यमा आफूलाई दर्शकले अभिनयमा पनि देख्न पाउने जानकारी दिए । उनले अभिनय र निर्देशन दुवैलाई सँगसँगै अगाडि बढाउन चाहेको उल्लेख गरे ।

‘पूर्णबहादुरको सारङ्गी’ पछि विजय बराल मुख्य भूमिकामा रहेको यस वर्षको पहिलो चलचित्र ‘जनै हराएको मान्छे : सम्बन्धका धागाहरू’ अहिले पोस्ट-प्रोडक्सनको क्रममा छ । चलचित्रमा विजय बरालसँगै भोलाराज सापकोटा, केकी अधिकारी, मिरुना मगर, गौरव पहाडी, सुशांक मैनाली, रियर राई, भावना खपांगी मगर, रुपेश लामा र सुमन थापालगायतका कलाकारको अभिनय रहेको छ ।

पेपरक्लिपको ब्यानरमा निर्माण भएको यस चलचित्रका निर्माता कमल न्यौपाने र विमल न्यौपाने हुन् । नारायण तिमिल्सिना, चुडामणि सिवाकोटी, आरके मानन्धर, सिआर बस्नेत, फिलिप डिसी र जेम्स महाराजन कार्यकारी निर्माताको भूमिकामा छन् ।