ठुलोपर्दा डटकम, बुटवल।
विश्व चलचित्र इतिहासमा नै पहिलो पटक चलचित्र निर्देशन गरेर गिनिज बुकमा समेत नाम लेखाइसकेका विश्वका कान्छा निर्देशक सौगात विष्टलाई यति बेला विभिन्न संघ, संस्थाहरुले सम्मान गरिरहेका छन् । नेपाल र नेपाली चलचित्रको नाम विश्वमा नै चिनाएको भन्दै बुटवलमा पनि सौगातलाई सम्मान गरिएको छ ।
वुटवल उद्योग वाणिज्य संघ, रुपन्देहीले सौगातलाई सम्मान गरेको हो । गायिका देविका बन्दनाको एकल साँझका अवसरमा बाल निर्देशक सौगात विष्टलाई सम्मानपत्र प्रदान गरिएको थियो । सम्मानपछि कार्यक्रममा बोल्दैं सौगात विष्टले आफुलाई यो सम्मानले अझ हौसला प्रदान गरेको बताए । गायिका देविका बन्दनाको एकल साँझका लागि बुटवल पुगेका नायिका नम्रता सापकोटा, नायक गजित बिष्ट र सौगात विष्टले आफ्नो भब्य सांगीतिक प्रस्तुती पनि दिएका थिए ।
वुटवल उद्योग बाणिज्य संघ, रुपन्देहीका अनुसार गायिका देविका बन्दनाको एकल साँझबाट संकलन भएको रकम भूकम्पपीडितलाई हस्तान्तरण गर्ने बताइएको छ ।