काठमाण्डौ। शुक्रवारबाट प्रदर्शनमा आएको यस वर्षको प्रतिक्षित चलचित्र ‘म यस्तो गीत गाउँछु’ले प्रदर्शनको पहिलो दिनदेखि नै दर्शकहरुको राम्रो साथ पाएको छ । जति चर्चा अहिले चलचित्रको गीतसंगीतको छ त्यति नै तारिफ फिल्म हेरेपछि दर्शकहरुले पल र पूजाको जोडीको गरेका छन् ।
प्रदर्शनको पहिलो दिन बम्पर ओपनिङ गरेको चलचित्रले दोस्रो दिन शनिवार पनि मल्टिप्लेक्स र सिंगल हल सबैतिर दर्शकको राम्रो साथ पाएको छ । निर्माता एवं निर्देशक सुदर्शन थापाले शनिवार पनि चलचित्र सबैतिर हाउसफूल रहेको बताए ।
प्रदर्शनको पहिलो दिनदेखि हल-हलमा पुगेर पल र पूजाले दर्शकको प्रतिक्रिया लिइरहेका छन् । हलमा पुगेका पल र पूजालाई सयौं दर्शकहरुले घेर्दै सेल्फी खिच्न भ्याए भने पललाई देख्दा यूवतीका आँखा रसाएका थिए । पूजा पनि चलचित्रबाट पाएका प्रतिक्रियाबाट खुशी देखिन्थिइन् ।
पल भन्छन्, ‘मैले सोचेको भन्दा पनि राम्रो प्रतिक्रिया पाएको छु । मेरो अभिनयलाई दर्शकहरुले रुचाइदिनु भएको छ । मसँग खुशी व्यक्त गर्ने शब्द नै छैन ।’ यस्तै, नायिका पूजा शर्मा ‘प्रेमगीत’भन्दा पनि ‘म यस्तो गीत गाउँछु’ राम्रो भन्ने दर्शकहरुबाट पाएको प्रतिक्रियाले फुरुङ्ग थिइन् ।
सुदर्शन थापा निर्देशित यो चलचित्रले प्रेमको कथा भन्छ । चलचित्रमा पल र पूजाका अलावा सरोज खनाल, रुपा राना, नविन मानन्धर, राजाराम पौडेल लगायतका कलाकारको पनि मुख्य भूमिका छ ।
भिडियो: