भाद्र २७ गतेबाट देशव्यापी प्रदर्शनमा आउन लागेको सम्राट बस्नेत निर्देशित चलचित्र ‘पासवर्ड’ नेपाल प्रदर्शनको दुई साता पछाडि विदेशका १२ देशका २४ शहरमा एकसाथ प्रदर्शन हुने निश्चित भएको छ । मलेसिया, जर्मनी, पोर्चुगल, क्यानडा, दुबई, अमेरिका, अस्ट्रेलिया, कोरिया, जापान, भारतलगायतका देशमा फिल्म एकसाथ प्रदर्शन हुने चलचित्रका कार्यकारी निर्माता अंकित गौतमले जानकारी दिए । सेप्टेम्बर २७ अर्थात् असोज १० चलचित्रको विदेश प्रदर्शन सुरु हुनेछ ।
यो चलचित्रको अधिकांश छायांकन यूकेमा भएको हो । नेपालबाट चोरिएर लण्डन पुर्याइएको मन्दिरको मूर्तिलाई नेपाल ल्याउन मुख्य पात्रले गर्ने संघर्षमा चलचित्र आधारित छ । एक्सन-लभस्टोेरी चलचित्रमा सअनुपविक्रम शाही, विक्रम जोशी, बुद्दि तामाङ, रविन्द्र झा, प्रविण खतिवडा, धिरेन शाक्य, छुल्ठिम गुरुङलगायतका कलाकारहरुको फिल्ममा अभिनय छ ।
निर्देशक बस्नेत स्वयंको द्वन्द्व निर्देशन रहेको चलचित्रमा अर्जुन पोखरेलको संगीत छ । अमरजीत सिंहको छायांकन र सौरभ लामाको डिओपी रहेको चलचित्रको पटकथा निर्देशक बस्नेत र महेश दवाडीले लेखेका हुन् । भने, कथा सिमा गुरुङको हो । चलचित्रमा अमित बस्नेत र हिराल जोशी निर्मातामा छन् । बलिउड अभिनेत्री सन्नी लियोनीले यो चलचित्रको उक गीतमा नृत्य गरेकी छन् ।