निर्माता गोविन्द शाहीलाई अदालतको सफाइ

निर्माता तथा वितरक गोविन्द शाहीलाई काठमाडौं जिल्ला अदालतले सफाइ दिएको छ । मंगलवार ठगी मुद्धामा उनलाई अदालतले ‘क्लिन चिट’ दिएको हो । चलचित्र ‘लिलिबिली’ को प्रदर्शनबाट उठेको ८७ लाख ७४ हजार ७ सय ६५ रुपैयाँ नदिएको र नदेखाएको भन्दै २०७६ को कात्तिकमा निर्देशक मिलन चाम्स र निर्माता सुदीप खड्काले उनीविरुद्ध प्रहरीमा उजुरी दिएका थिए ।

सोही उजुरीको आधारमा प्रहरीले उनलाई पक्राउ गरेको थियो र काठमाडौं जिल्ला अदालतले हिरासतमा राखेर अनुसन्धान गर्न आदेश दिएको थियो । यसपछि उनले दुई हप्ता हिरासतमा विताए । तर, सर्वोच्च अदालतको आदेशपछि उनी बन्दीप्रत्यक्षीकरण रिटमा रिहा भए । पछि फेरि अदालतले पटक-पटक उपस्थित हुन गरेको आदेश नमानेको भन्दै उनी पक्राउ परेका थिए ।

अदालतले ठगी मुद्धामा ‘क्लिन चिट’ दिएपछि शाहीले बुधवार फेसबुकमा स्टाटस लेख्दै आफूले न्याय पाएको भन्दै अदालतप्रति आभार व्यक्त गरेका छन् । उनले मिलन र सुदीपप्रति कटाक्ष गर्दै लेखेका छन्, ‘सरकारी पदासिन व्यक्तिको अधिकार मिसयूज गरी अरुलाई दुःख दिने काम, अरुलाई विगार्न खोज्नुभन्दा पहिला आफूलाई एकपटक सोच्नुपर्छ भन्ने यो गतिलो जवाफ पनि हो ।’