निफमा अनुराग कश्यपको मास्टर क्लास

यही बैशाख २३ गतेदेखि २७ गतेसम्म अनलाइन माध्यमबाट हुन लागेको नेपाल अन्तर्राष्ट्रिय फिल्म फेस्टिभल (निफ) मा बलिउड निर्माता, निर्देशक तथा कलाकार अनुराग कश्यपले मास्टर क्लास दिने भएका छन् । उद्घाटनपछिको पहिलो सेसनमा उनले ३ः३० बाट ४ः३० सम्म चलचित्रकर्मी र दर्शकलाई चलचित्र सम्बन्धि आफ्नो अनुभव बाँड्ने निफद्वारा जारी विज्ञप्तिमा भनिएको छ ।

फरक धारका चलचित्र निर्माणमा आफ्नो बेग्लै पहिचान बनाएका अनुरागले लेखकको रुपमा करिअर सुरु गरेका थिए । चलचित्र ‘पाँच’ बाट निर्देशनमा होमिएका उनलाई चलचित्र ‘ग्याङ्स अफ वासेपुर’ ले चर्चामा ल्याएको थियो । यसपछि उनले ‘मनमर्जियाँ’, ‘चोक्ड’, ‘मुक्काबाज’ जस्ता चलचित्र निर्देशन गरे । उनले ‘एके भर्सेस एके, आइ एम, अकिरा’ लगायतमा चलचित्र अभिनय पनि गरेका छन् ।

यसपटक महोत्सवमा सहभागी चलचित्रहरु नेट टेलिभिजन र फेस्टिभलको फेसबुक पेजबाट प्रत्यक्ष प्रसारण गरिने निफ अध्यक्ष केपी पाठकले बताए । ‘विश्वका कथाहरुको उत्सव’ नाराका साथ चलचित्र संस्कृतिको विकास गर्ने उद्देश्य राखिएको महोत्सवमा यो वर्ष कोरोना महामारीको विषयमा बनेका चलचित्रलाई अलग्गै विधामा प्रतिस्पर्धा गराइने र अवार्ड पनि वितरण गरिने उनको भनाई छ ।