कोरोना संक्रमण भएर स्वास्थ्य लाभ गरिरहेका कलाकार मदनकृष्ण श्रेष्ठलाई फेरि अस्पताल भर्ना गरिएको छ । अक्सिजन लेवलमा कमी आएपछि उनलाई पुनः अस्पताल लगिएको हो । आठ दिन अस्पतालमा उपचारपछि गएको आइतबार घर फर्किएका उनलाई भोलिपल्टै अस्पताल लगिएको उनकी छोरी सराना श्रेष्ठले बताइन् । अहिले श्रेष्ठको स्वास्थ्य अवस्था सामान्य रहेको उनको भनाई छ ।
![](https://i0.wp.com/www.thuloparda.com/wp-content/uploads/2021/05/Madan-Krishna-Shrestha.jpg?resize=720%2C413&ssl=1)
अक्सिजन लेवल ८४ मा झरेपछि अस्पतालमा भर्ना गरिएको सरानाले बताइन् । श्रेष्ठको छातीमा सामान्य इन्फेक्सन देखिएकाले चिकित्सकहरुले केही दिन अस्पतालमै राखेर उपचार गर्ने निर्णय लिएको उनले बताएकी छन् । मदनकृष्णको हाल सामान्य सपोर्टमा उपचार भइरहेको छ । श्रेष्ठको कोरोना रिपोर्ट नेगेटिभ आएको छैन । उनका परिवारको पाँचै जनामा कोरोना संक्रमण देखिएको छ ।
८ दिन मेडिसिटी अस्पतालमा उपचार गरेर डिस्चार्ज भएपछि उनले फेसबुकमा एक भिडियो साझेदार गर्दै संसारलाई महासंकट परेको यो दुःखको घडीमा सबैले सबैलाई माया गर्न र राम्रो सोच्न सुझाएका थिए । अहिलेको कोरोनाले इनर्जी पावर शुन्य बनाउने उनले बताएका थिए । कोरोना संक्रमणपछि जिन्दगीमा कहिल्यै नभोगेको गलाइ महशुस भएको उनको भनाई छ ।