निर्देशक तथा कलाकार शिशिर राणालाई बैंकिङ कसुरको मुद्दामा प्रहरीले पक्राउ गरेको छ । उनलाई सीआईबीको टोलीले सोमवार बिजुली बजारबाट पक्राउ गरेको हो । सीआईबीका अनुसार, राणाले ललितपुरका एक व्यक्तिबाट ४५ लाख ऋण लिएका थिए । तर, भुक्तानी गर्दा रकम पर्याप्त नभएको नबिल बैंकको चेक दिएपछि उनीविरुद्ध बैंकिङ कसुरको उजुरी परेको थियो ।
![](https://i0.wp.com/www.thuloparda.com/wp-content/uploads/2021/07/shishir-rana.jpg?resize=720%2C404&ssl=1)
सोही उजुरीका आधारमा उच्च अदालत पाटनले २६ माघ २०७७ मा ४५ लाख जरिवाना र १० दिन कैद सजायको फैसला गरेको थियो । प्रहरीले राणालाई पक्राउ गरेर फैसला कार्यन्वयनका लागि ललितपुर जिल्ला अदालतमा पेश गरेको छ । बैंकिङ कसुर तथा सजाय ऐन २०६४ को दफा ३ (ग) बमोजिमको कसूरमा दफा १५ (१) बमोजिम अदालतले सजायको फैसला सुनाएको थियो ।
![](https://i0.wp.com/www.thuloparda.com/wp-content/uploads/2021/07/shisir-rana-1444x2048-1.jpg?resize=542%2C768&ssl=1)
शिशिर राणा दुई दशकदेखि चलचित्र क्षेत्रमा सक्रिय छन् । ‘तिमीसँग र पोई पर्यो काले’ गरी दुई चलचित्रको निर्देशन गरिसकेका उनले ‘अन्दाज, वडा नम्बर छ, क्लासिक, वीर विक्रम, कायरा, रामकहानी’ लगायत दर्जनौं चलचित्रमा अभिनय गरेका छन् । ‘माला’ नामक चलचित्रको निर्माण समेत गरेका उनले प्रोडक्सन म्यानेजरका रूपमा नेपाली चलचित्र क्षेत्रमा प्रवेश गरेका थिए ।