सुनसरीको रामधुनी नगरपालिका वडा नम्बर ५ को झुम्का बजारमा रहेको म्याजिक सिनेमा हलमा आगलागी हुँदा २ करोड रुपैयाँ बराबरको क्षति भएको छ । जिल्ला प्रहरी कार्यालय सुनसरीका एसपी सन्जयसिंह थापाका अनुसार, ब्यवसायिक भवनको तेस्रो तलामा रहेको म्याजिक सिनेमा हल जलेर क्षति भएको हो ।
शनिबार विहान ९ः२० देखि लागेको आगो साढे ११ बजे नियन्त्रणमा आएको थियो । सिनेमा हलमा ‘करेन्ट सर्ट’ भएर आगलागी भएको प्रहरीले जनाएको छ । आगो नियन्त्रणका लागि ६ वटा दमकलको प्रयोग गरिएको थियो । समयमा नै आगो नियन्त्रणमा आएका कारण सिनेमा हल नजिकका अन्य घरमा आगो फैलन नपाएको प्रहरीको भनाइ छ ।
साइराम मार्केटको भवनमा रहेको म्याजिक सिनेमा हल झुम्काको एकमात्र सिनेमा हल हो । कोभिड १९ महामारीपछि उक्त सिनेमा हल बन्द रहदै आएको थियो ।