भारतको बाल गायन रियालिटी शोका लागि सुरशालाले अडिसन लिँदै

गायक प्रशान्त तामाङले भारतको चर्चित गायन रियालिटी शो ‘इन्डियन आइडल’ को उपाधि जितेपछि भारतीय टेलिभिजनमा प्रशारण हुने गायन तथा डान्स रियालिटी शोमा नेपालीहरुको आकर्षण र सहभागिता बढेको छ । सुशान्त खत्री, प्रितम आचार्य, आयुष केसी लगायतले भारतका रियालिटी शोमा राम्रो स्थान हासिल गर्न सफल भएका थिए ।

तर, धेरैलाई भारतका रियालिटी शोमा कसरी भाग लिने भन्नेबारे थाहा हुँदैन । भारतको सोनी र जि टिभीबाट प्रशारण हुने बाल गायन रियालिटी शोमा सहभागि हुन चाहनेहरुलाई भने काठमाडौंको जावलाखेलमा रहेको सुरशाला म्यूजिक एकेडेमीले सहयोग गर्दै आएको छ । यही एकेडेमीले प्रितम आचार्य र आयुष केसीलाई भारतको चर्चित गायन रियालिटी शो ‘सारेगमपा’ को स्टेजसम्म पुर्‍याएको थियो ।

यस वर्ष पनि सुरशालाले सोनी र जि टिभीबाट प्रशारण हुने बाल गायन रियालिटीमा नेपाली प्रतिभालाई सहभागि गराउन अडिसनको तयारी थालेको छ । यस एकेडेमीका कार्यकारी अध्यक्ष तथा गायक अमृत क्षेत्रीले सोनी र जि टिभीमा अब हुने गायन रियालिटी कार्यक्रमको लागि सुरशालामा विशेष अडिसनको तयारी भइरहेकोले ७ बर्षदेखि १४ बर्षसम्मका इच्छुक बाल प्रतिभा तथा अभिभावहरुले सम्पर्क गर्न आग्रह गरेका छन् ।

सुरशाला म्युजिक एकेडेमीले ‘सुरशाला आइडल जुनियर’ नाम दिएर गायन प्रतियोगिता पनि गर्दै आएको छ । सन् २००४ मा स्थापना भएको सुरशाला एकेडेमीले गायन तथा संगीत सिक्नेहरुलाई नियमित रुपमा सिकाउँदै आएको छ । २०७२ सालमा गएको भूकम्पपछि यो एकेडेमीले विभिन्न स्थान, सेल्टर, विद्यालयहरुमा पुगेर मानिसहरुलाई म्युजिकल थेरापी दिएको थियो ।