चलचित्र ‘चिसो मान्छे’ मा १८ लाख पारिश्रमिक लिएर महंगी अभिनेत्रीको सूचीमा आफूलाई पनि उभ्याएकी स्वस्तिमा खड्काले नेपाली चलचित्र क्षेत्रमा कलाकारको पारिश्रमिकलाई लिएर हुने गरेको बहस अनावश्यक रहेको बताएकी छन् । कलाकारको पारिश्रमिकको भन्दा पनि कामको मुल्यांकन हुनुपर्ने उनको भनाई छ ।
स्वस्तिमा भन्छिन्, ‘मैले आजसम्म कुन चलचित्रमा कति पारिश्रमिक लिएँ भनेर भनेको छैन । मैले पारिश्रमिक कति लिएँ भन्ने कुरा महत्त्वपूर्ण होइन, मैले फिल्ममा काम कस्तो गरेँ त्यो महत्त्वपूर्ण हो । पारिश्रमिकको बारेमा हामी अनावश्यक बहस गरिरहेका छौं । यो बेला हामी गम्भीर हुनुपर्छ ।’
कलाकार बजारमा मुल्य झुन्ड्याएर राखेको सामना नभएको उनको तर्क छ । आर्टमा पैसा प्राथमिकतामा नपर्ने बताउँदै उनले आफूले काम गर्न खोजेको क्यारेक्टरबाट प्रस्ताव आए सित्तैमा पनि चलचित्रमा गर्न सक्ने बताएकी छन् । स्क्रिप्ट मन परे आफैं चलचित्रमा लगानी गर्न पनि तयार रहेको उनी बताउँछिन् । तर, पैसाका लागि आफूले चलचित्रमा काम नगर्ने स्वस्तिमाको भनाई छ ।
उनी अगाडि भन्छिन्, ‘चलचित्रको हकमा मेरो लागि पैसा सेकेन्डरी कुरा हो । अरु कुरामा बरु म पारिश्रमिकलाई पहिलो प्राथमिकता दिन्छु होला तर चलचित्रको हकमा त्यस्तै हुन्न । मैले चलचित्रलाई अलग स्थानमा राखेको छु । म पैसाका लागि चलचित्रमा काम गर्दिनँ ।’ स्वस्तिमाको नयाँ चलचित्र ‘चपली हाइट ३’ आगामी पुष २ गतेबाट प्रदर्शनमा आउँदैछ ।