काठमाडौँ।
चलचित्र ‘दुई रुपैयाँ’ मा समावेश चर्चित गीत ‘कुटुमा कुटु’ लाई युट्युबमा नेपालको जनसङ्ख्याभन्दा झन्डै सात गुणा बढी भ्यूज मिलेको छ । नेपालको जनसङ्ख्या ३ करोड नजिक छ । यस गीतलाई युट्युबमा मात्र २० करोडभन्दा बढी पटक हेरिएको छ । छ वर्ष अगाडि युट्युब रिलिज भएको यो गीत राजनराज सिवाकोटीले तयार पारेका हुन् ।
‘कुटुमा कुटु’ ले ऐतिहासिक रेकर्ड बनाएको छ । आजसम्म कुनै नेपाली गीतलाई युट्युबमा २० करोड पटक हेरिएको रेकर्ड छैन । यस गीतले पाएको सर्वाधिक भ्यूजलाई सङ्गीतकर्मीले ऐतिहासिक क्षण बताएका छन् । यो रेकर्ड तोड्न नेपाली गीतलाई निकै ठुलो चुनौती देखिन्छ ।
गीतले झैँ चलचित्र ‘दुई रुपैयाँ’ ले बक्स अफिसमा रेकर्ड नबनाए पनि पैसा भने राम्रै छापेको थियो । यो गीतका कारण पनि चलचित्रको इनिसियल बक्स अफिस बलियो देखिएको थियो । ‘कुटुमा कुटु’ गीतमा राजनलाई गायिका मेलिना राईले गायनमा साथ दिएकी छन् । प्रायः राजनराजले तयार गरेका फिल्मका गीतले युट्युबमा करोड भ्यूज बटुलेका छन् ।
यस गीतमा अभिनेत्री स्वस्तिमा खड्कासँगै अभिनेता द्वय निश्चल बस्नेत, आसिफ शाह र बुद्धि तामाङले ठुम्का लगाएका छन् । यो गीतमा ठुम्का लगाएर लाइमलाइटमा आएकी स्वस्तिमा अहिले नेपाली चलचित्रकी डिमाण्डेड अभिनेत्रीमा पर्छिन् । यो गीतकै कारण उनको धरमराएको चलचित्र करिअरले गति लिएको थियो । यस गीतका गीतकार राजनराज स्वयं हुन् ।
भिडियो: