काठमाडौं – अनिल बुढा मगरको निर्देशनमा बन्ने चलचित्र ‘मितज्यू’मा अभिनेता दयाहाङ राईसँगै भारतीय रियालिटी शो ‘डान्स इन्डिया डान्स लिल मास्टर्स’ र ‘झलक दिखलाजा’ विजेता तेरिया फौजा मगर अनुबन्धित भएकी छन् । यससँगै तेरियाले नेपाली रजतपटमा डेब्यु गरेकी छन् ।
यसअघि भारतीय वेब सिरिजमा अभिनय गरेकी तेरियाको नेपाली चलचित्रमा प्रवेशसँगै उनलाई नेपाली चलचित्रमा हेर्न दर्शकहरूले व्यक्त गरेको चाहना अब पूरा भएको छ ।
जनक घर्ती मगरको लगानीमा निर्माण हुने ‘मितज्यू’मा दयाहाङले दोस्रो पटक सहकार्य गर्दैछन् । यसअघि उनीहरूले सुपर हिट चलचित्र ‘घरज्वाइँ’मा काम गरेका थिए । जीएम मूभिज प्रोडक्सन र एबीएम सिने प्रोडक्सनको ब्यानरमा निर्माण हुने यो चलचित्रको छायाङ्कन अर्को वर्ष सुरु हुनेछ । चलचित्रमा दयाहाङ र तेरिया बाहेक अन्य कलाकार को हुने भन्ने निर्माण टिमले खुलाएको छैन ।
महेश राईको लेखन रहेको ‘मितज्यू’ अर्को वर्षको चैत २७ गते प्रदर्शनमा आउनेछ ।