काठमाडौं – निर्देशक चन्द्र पन्तले आफ्नो नयाँ चलचित्र ‘आ बाट आमा’ निर्माण गर्ने घोषणा गरेका छन् । सोमबार उनले चलचित्रको पहिलो पोस्टर सार्वजनिक गर्दै निर्माणको जानकारी दिएका हुन् । चलचित्र आउँदो फागुन १५ गते प्रदर्शनमा आउने भएको छ ।
सार्वजनिक पोस्टरमा एक बच्चाले रोइरहेकी आमाको आँसु पुछ्न खोजेको देखिन्छ । यसले चलचित्र आमा र बच्चाको मायाको कथामा आधारित हुने सङ्केत गर्छ ।
आर्या इन्टरटेन्टमेन्टको प्रस्तुतिमा बन्ने यो चलचित्रको छायाङ्कन आउँदो भदौ महिनाबाट सुरु हुनेछ । चलचित्रमा कुन-कुन कलाकार हुनेछन् भन्ने बारेमा अहिले जानकारी दिइएको छैन । चलचित्रको कथा अभिमन्यु निरवीले लेखेका हुन् । निर्देशक पन्तले बताए अनुसार यो चलचित्रको थिम पोस्टर मात्र सार्वजनिक गरिएको हो र केही दिनमै कलाकार तथा प्राविधिक टोलीको नाम पनि सार्वजनिक गरिनेछ ।
चन्द्र पन्तले यसअघि ‘ह्रस्व दीर्घ’ नामक एक्सन चलचित्र निर्देशन गरेका थिए । त्यसबाहेक उनले भोजपुरी र नेपाली गरी ६० भन्दा बढी चलचित्रमा द्वन्द्व निर्देशकको रूपमा काम गरेका छन् ।