काठमाडौं – भर्खरै सम्पन्न प्रतिनिधिसभा निर्वाचनमा उम्मेदवार बनेकी अभिनेत्री निशा अधिकारी चुनावी चटारोलाई बिट मार्दै पुनः आफ्नो मूल कर्मथलो अर्थात् चलचित्र क्षेत्रमै फर्किएकी छन्। गतिशील लोकतान्त्रिक पार्टीका तर्फबाट काठमाडौं निर्वाचन क्षेत्र नम्बर ५ मा प्रतिस्पर्धा गरेकी तर पराजित भएकी निशा शनिवारदेखि नयाँ चलचित्र ‘कस्तुरी’को छायाङ्कनमा जोडिएकी हुन्।
यस चलचित्रमा उनले चर्चित अभिनेता निखिल उप्रेतीसँग पर्दामा सहकार्य गर्दैछिन्। रोचक कुरा त के छ भने, यी दुई कलाकार करिब १६ वर्ष लामो अन्तरालपछि पुनः एकसाथ दर्शकमाझ आउन लागेका हुन्। सन् २००९ मा रिलिज भएको चलचित्र ‘मिसन पैसा’ मार्फत निशाले अभिनय यात्राको थालनी गरेकी थिइन्, जहाँ निखिल नै उनका पहिलो सह-कलाकार थिए।
‘कस्तुरी’को निर्माण टोली निशाको चुनावी अभियान सकिने प्रतीक्षामा बसेको थियो। आफ्नो लागि पर्खिदिएकोमा निर्माण युनिटप्रति आभार प्रकट गर्दै निशाले सामाजिक सञ्जालमार्फत छायाङ्कन सेटको तस्बिर सार्वजनिक गरेकी छन्। तस्बिरमा उनी अभिनेता निखिल उप्रेतीका साथ देखिएकी छन्। आफ्नो पहिलो चलचित्रको पहिलो सह-कलाकारसँग यतिका वर्षपछि पनि सँगै काम गर्न पाउँदा आफू अत्यन्तै हर्षित भएको उनले उल्लेख गरेकी छन्। साथै, निखिलसँगका कुराकानी आफूलाई सधैँ मीठो लाग्ने अनुभव पनि उनले फ्यानहरूसँग साझा गरेकी छन्।
काठमाडौं-५ बाट चुनावी प्रतिस्पर्धामा उत्रिएकी निशाले भने संसद्को यात्रा तय गर्न सकिनन्। उक्त क्षेत्रबाट राष्ट्रिय स्वतन्त्र पार्टी (रास्वपा) का उम्मेदवार सस्मित पोखरेल निर्वाचित भएका छन्।