काठमाडौं – नेपाली चलचित्र इतिहासकै सर्वाधिक व्यापार गर्न सफल सिनेमा ‘पूर्ण बहादुरको सारङ्गी’का निर्माता विनोद पौडेल अब निर्देशकको भूमिकामा देखिने भएका छन्। नयाँ वर्षको शुभसाइत पारेर उनले आफ्नो डेब्यु निर्देशकीय चलचित्र ‘दुई किनारा’ निर्माणको औपचारिक घोषणा गरेका हुन्। यसअघि तीनवटा चलचित्रमा लगानी गरिसकेका पौडेलले आफ्नो चौथो प्रोजेक्टमार्फत निर्देशनको कमान्ड सम्हाल्न लागेका हुन्।
चलचित्रको घोषणासँगै सार्वजनिक गरिएको ‘टाइटल पोस्टर’ले निकै गहिरो र दार्शनिक अर्थ बोकेको छ। पोस्टरमा पहाडका दुई भिन्न स्वरूपलाई कलात्मक ढंगले प्रस्तुत गरिएको छ। एकातिर हरियालीले भरिपूर्ण जंगल र अर्कोतिर उराठलाग्दो नाङ्गो डाँडाको बीचमा रहेको नागबेली गोरेटोले मानिसको जिन्दगीका सुख र दुःख रूपी दुई फरक पाटालाई विम्बात्मक रूपमा दर्साएको छ। यसले जीवनको यात्रामा लिइने सानासाना निर्णयहरूले कसरी दूरगामी र ठूलो प्रभाव पार्छन् भन्ने गम्भीर विषयलाई चलचित्रको मुख्य कथावस्तु बनाएको संकेत गर्छ।
निर्माण पक्षले यस चलचित्रलाई ठीक एक वर्षपछि, अर्थात् वि.सं. २०८४ सालको वैशाख १ गते प्रदर्शनमा ल्याउने लक्ष्यसहित रिलिज मिति तय गरेको छ। यद्यपि, चलचित्रको पर्दामा देखिने कलाकारहरू, कथाकार तथा अन्य प्राविधिक टोलीको बारेमा भने निर्माण पक्षले हालसम्म कुनै पनि आधिकारिक जानकारी बाहिर ल्याएको छैन।
बक्स अफिसमा ऐतिहासिक रेकर्ड राख्न सफल ‘पूर्ण बहादुरको सारङ्गी’बाट सफल निर्माताको रूपमा स्थापित भएका विनोदले त्यसपछि ‘अभिमन्यु’ निर्माण गरेका थिए। उनको निर्माणमा बनेको अर्को चलचित्र ‘रोल नं १’ पनि यतिबेला प्रदर्शनको पर्खाइमा रहेको छ। निर्माण क्षेत्रमा प्राप्त गरेको लगातारको सफलता र अनुभवलाई अब उनले ‘दुई किनारा’मार्फत निर्देशकीय पर्दामा उतार्नेछन्।