निर शाहको चलचित्र ‘कमला मिस’ साउन २२ मा रिलिज हुने

काठमाडौं – नेपाली चलचित्र इतिहासमा आफ्ना कालजयी सिर्जनामार्फत अमिट छाप छाड्न सफल वरिष्ठ फिल्मकर्मी निर शाह करिब १० वर्ष लामो अन्तरालपछि पुनः निर्देशनमा फर्किएका छन्। उनको पछिल्लो निर्देशकीय प्रस्तुति ‘कमला मिस’ आगामी साउन २२ गतेबाट देशभरका सिनेमा घरहरूमा प्रदर्शनमा आउने भएको छ। बिहीबार चलचित्र निर्माण पक्ष र वितरक कम्पनीहरूबीच सम्झौतापत्रमा हस्ताक्षर भएसँगै फिल्मको आधिकारिक प्रदर्शन मिति तय गरिएको हो।

यस चलचित्रको वितरणको जिम्मा एप्पल इन्टरटेन्मेन्ट, रीच इन्टरटेन्मेन्ट र एफडी कम्पनीले संयुक्त रूपमा लिएका छन्। विशुद्ध मनोवैज्ञानिक कथावस्तुलाई पर्दामा उतारिएको यस चलचित्रमा निर्देशक शाह स्वयंको पनि मुख्य अभिनय रहेको छ। उनीसँगै रमेश बुढाथोकी, बासना तिमिल्सिना, शिवम सराफ क्षेत्री, आरभ दाहाल, भावना मगर, कृष्ण मुरारी ढुंगेल, सुशान्त कुमार श्रेष्ठ, जयन्त रेग्मी, सुरेश थापा, राजन केसी र सञ्जय खतिवडा लगायतका कलाकारहरूले फिल्ममा प्राण भरेका छन्।

विजय मल्ल स्मृति प्रतिष्ठानको प्रस्तुति रहेको ‘कमला मिस’लाई उमा मल्लले निर्माण गरेकी हुन्। साहित्यकार विजय मल्लको मूल कथामा आधारित यस फिल्मको पटकथा तथा संवाद भने निर्देशक शाहसहित प्रजल दुलाल र सुगम दुलालले संयुक्त रूपमा बुनेका छन्। चलचित्रमा उमेश मल्ल र चैतन्य प्रधान कार्यकारी निर्माताको भूमिकामा छन् भने लाइन प्रोड्युसरको जिम्मेवारी पुष्कर लामाले सम्हालेका छन्।

प्राविधिक पाटोतर्फ पनि फिल्मलाई अब्बल बनाउने प्रयास गरिएको छ। शिवराम श्रेष्ठको उत्कृष्ट छायांकन रहेको यस चलचित्रमा युग भुसालले संगीत भरेका छन् भने रामजी लामिछानेले कोरियोग्राफी गरेका छन्। यसैगरी, फिल्मको निर्माण व्यवस्थापन भोला सुवेदीले हेरेका छन् भने सगर बोहरा मुख्य सहायक निर्देशक रहेका छन्। विगतमा ‘वासुदेव’, ‘पच्चीस वसन्त’, ‘राजमती’, ‘वसन्ती’, ‘मसान’ र ‘सेतोबाघ’ जस्ता नेपाली सिनेमाका उत्कृष्ट र ऐतिहासिक फिल्महरू पस्किसकेका शाहको यो पुनरागमनलाई सिने वृत्तमा निकै चासो र महत्त्वका साथ हेरिएको छ।