नेपाली रजतपटकी चर्चित अभिनेत्री रेखा थापाले आफ्नो ब्यानरको आठौं प्रस्तुतिका रूपमा नयाँ चलचित्र ‘काउकुती’ निर्माण गर्ने भएकी छन्। भारतको उत्तराखण्डस्थित प्रख्यात हिन्दू सन्त नीम करोली बाबाको आश्रम ‘कैंची धाम’मा सोमबार साँझ विशेष पूजाआजा गरेपछि अभिनेत्री थापाले मंगलबार यस नयाँ प्रोजेक्टको औपचारिक निर्माण घोषणा गरेकी हुन्।
यस चलचित्रको निर्देशनको बागडोर चर्चित टेलिभिजन शो ‘कमेडी दरबार’की निर्देशक श्रद्धा प्रसाईंले सम्हाल्ने भएकी छन्। श्रद्धाले यसअघि ‘ककाकिकी’ नामक चलचित्रको समेत निर्देशन गरिसकेकी छन्, जुन हाल प्रदर्शनको पर्खाइमा छ। ‘काउकुती’मा अभिनेत्री थापा स्वयं मुख्य भूमिकामा प्रस्तुत हुनेछिन् भने उनलाई पर्दामा साथ दिन एक नयाँ अनुहार (नवअभिनेता) लाई मुख्य नायकका रूपमा भित्र्याउने तयारी भइरहेको निर्माण पक्षले जनाएको छ।
चलचित्रको कथावस्तु विक्की अग्रवाल र विनेश राईले संयुक्त रूपमा तयार पारेका हुन् भने यसको पटकथा विनेश आफैंले लेखेका छन्। यस प्रोजेक्टमा नवराज श्रेष्ठका साथै रेखाका श्रीमान् बलराम शाही ठकुरीको मुख्य लगानी रहनेछ।
आगामी असोज महिनाबाट छायांकनको फ्लोरमा जाने तय भएको यस चलचित्रमा प्रशान्त सिवाकोटीले संगीत भर्नेछन्। यसका साथै, चलचित्रको एउटा विशेष गीतमा पछिल्लो समयका चर्चित र्यापर लिल झोला (आकाश क्षेत्री) को स्वर सुन्न पाइने जानकारी निर्माण टिमले दिएको छ।