नीता ढुङ्गाना फिल्मस्को ब्यानरमा निर्माण भइरहेको नयाँ नेपाली चलचित्र ‘पार्वती’को सम्पूर्ण छायांकन कार्य सफलतापूर्वक सम्पन्न भएको छ। सुरुवाती चरणमा एक महिनाको समयसीमा निर्धारण गरेर सुटिङ थालिएको भए तापनि निर्देशक तथा कलाकारहरूको अथक मेहेनत र सक्रियताका कारण जम्मा २२ दिनमै (लक्ष्यभन्दा ८ दिन अगावै) सम्पूर्ण काम सकिएको निर्माण पक्षले औपचारिक रूपमा जानकारी दिएको छ। आगामी भदौ १२ गतेलाई आधिकारिक प्रदर्शन मिति तोकिएकाले पनि निर्माण टोलीले निकै तीव्र गतिमा छायांकनको काम अगाडि बढाएको थियो।
गत चैत २४ गते मंगलबारका दिन कास्की जिल्लाको माछापुच्छ्रे गाउँपालिका वडा नम्बर १ स्थित मिर्सा गाउँमा शुभमुहूर्त गर्दै यस चलचित्रको छायांकन आरम्भ गरिएको थियो। यस चलचित्रमार्फत अभिनेत्री नीता ढुङ्गानाले निर्देशनमा समेत हात हालेकी छन्। उनकै निर्देशन रहेको यस प्रोजेक्टमा उनी आफैं मुख्य भूमिकामा प्रस्तुत भएकी छन्। नीताका साथमा चलचित्रको पर्दामा दीपाश्री निरौला, अशोक दर्जी, सिरु बिष्ट, राधिका कँडेल, राज पंगेनी शर्मा, राजेन्द्र नेपाली र आशा पौडेल लगायतका कलाकारहरूको सशक्त अभिनय देख्न पाइनेछ।
चलचित्रको मूल कथा र पटकथा निर्देशक ढुङ्गाना स्वयंले सिर्जना गरेकी हुन् भने यसको विस्तृत स्क्रिप्ट लेखनको जिम्मा शिवम् अधिकारीले पूरा गरेका छन्। सुदीप बरालको छायांकन (डीओपी) रहेको ‘पार्वती’मा चर्चित डान्स ग्रुप कार्टुन क्रुका निर्देशक तथा डान्सर सरोज अधिकारी क्रियटिभ निर्देशकका रूपमा जोडिएका छन्। म्युजिक भिडियोको दुनियाँमा निकै रुचाइएका सरोजले चलचित्रको ठूलो पर्दामा क्रियटिभ निर्देशकको रूपमा भने पहिलोपटक आफ्नो कला प्रस्तुत गर्न लागेका हुन्।
हरिहर अधिकारी निर्माता रहेको यस चलचित्रमा शंकर पाण्डेले कार्यकारी निर्माता तथा प्रोडक्सन म्यानेजरको दोहोरो जिम्मेवारी सम्हालेका छन्। चलचित्रको दृश्य सम्पादन साहिल खानले गर्नेछन् भने पोस्टर डिजाइनको काम रोयल भिमसेनको रहेको छ। तीव्रताका साथ सुटिङको काम सकाएको निर्माण टोली यतिबेला तोकिएकै मितिमा दर्शकमाझ चलचित्र पुर्याउने लक्ष्यसहित पोस्ट प्रोडक्सनको तयारीमा जुटेको छ।