काठमाडौं – आगामी साउन १ गतेदेखि प्रदर्शनमा आउन लागेको बहुप्रतीक्षित चलचित्र ‘गौँथली’ को फस्ट लुक पोस्टर सार्वजनिक भएको छ। निर्माण पक्षले शुक्रबार चलचित्रका दुईवटा अर्थपूर्ण पोस्टरहरू दर्शकमाझ ल्याएको हो। सार्वजनिक पोस्टरले ग्रामीण नेपाली समाजको यथार्थपरक कथा र पात्रहरूको मनोवैज्ञानिक अवस्थालाई उजागर गर्ने सफल प्रयास गरेको छ।
सार्वजनिक गरिएको पहिलो पोस्टरमा चलचित्रका मुख्य अभिनेता अरुण क्षेत्री र अभिनेत्री सिम्रन खड्कालाई दुलाहा-दुलहीको अवतारमा प्रस्तुत गरिएको छ। दौरासुरुवाल र ढाका टोपीमा सजिएका अरुणको शारीरिक हाउभाउ र औँलाको असामान्य अवस्थाले उनी शारीरिक रूपमा केही फरक क्षमता भएको (एबनर्मल) पात्र रहेको स्पष्ट सङ्केत गर्छ। उनको पटुकीमा सिउरिएको गुलेली र अनुहारमा देखिएको जोसले पात्रको उच्छृङ्खल स्वभावलाई दर्साउँछ। यसको ठीकविपरीत, बेहुलीको पहिरनमा रहेकी सिम्रनको अनुहारमा भने गहिरो तनाव र निराशा झल्किएको छ। पृष्ठभूमिमा देखिएको खरले छाएको सानो झुपडी र आगनले उनीहरू निकै विपन्न ग्रामीण परिवारका सदस्य हुन् भन्ने बुझाउँछ।
त्यसैगरी, चलचित्रको दोस्रो पोस्टरमा अभिनेत्री सिम्रनलाई मात्र स्थान दिइएको छ। खाली खुट्टा डोकोमा स्याउला बोकेर हिँडिरहेकी उनी हातमा किताब लिएर पढ्दै गरेकी देखिन्छिन्। यसले बिहेपछि पनि घरधन्दा सम्हाल्दै आफ्नो पढ्ने तीव्र चाहनालाई मर्न नदिएको एउटी संघर्षशील नारीको कथा बोल्छ। पृष्ठभूमिको हिमशृङ्खलाले चलचित्रको कथा उच्च पहाडी भेगको गरिब परिवारमा आधारित रहेको प्रमाणित गर्छ। निर्माण पक्षका अनुसार, ‘गौँथली’ ले घर, परिवार र आपसी सामीप्यताको प्रतीकात्मक अर्थ बोकेको छ।
डा. कपिल रिजालको निर्देशनमा तयार भएको यस चलचित्रमा अरुण र सिम्रनका अलावा मदनकृष्ण श्रेष्ठ, प्रकाश घिमिरे, लुनिभा तुलाधर, रविन्द्र झा, ईश्वरी बराल, संयोग रसाइली, सीतादेवी तिमिल्सिना, लक्ष्मीनाथ तिमिल्सिना र राजेन्द्र नेपालीलगायतका कलाकारहरूको सशक्त अभिनय रहेको छ। बाल कलाकारका रूपमा अंशु ओली र प्रिन्स नेपाली अटाएका छन्। वरिष्ठ चिकित्सक तथा गीतकार डा. भोला रिजालको मूल कथा रहेको यस चलचित्रको पटकथा तथा संवाद लेखनमा निर्देशक डा. कपिललाई निश्चल कुँवर, निरज नेपाल र गिरिराज घिमिरेले सघाएका छन्।
भोला रिजाल प्रोडक्सन र सुमन गिरी प्रोडक्सनको ब्यानरमा निर्मित यस सिनेमाकी कार्यकारी निर्माता सरला रिजाल हुन् भने सुमन गिरी र डा. कपिल रिजाल निर्माताका रूपमा रहेका छन्। इन्दु गिरी, मनिष रिजाल, प्रलय रिजाल र जीवन ओली चलचित्रका सह-निर्माता हुन्। चलचित्रलाई हरि हुमागाईंले छायांकन गरेका हुन् भने सम्पादन मिलन श्रेष्ठले गरेका छन्। शम्भुजीत बासकोटा, थानेश्वर गौतम र प्रशान्त सिवाकोटीको सङ्गीत रहेको यस सिनेमामा एलिस कार्कीको पार्श्व सङ्गीत सुन्न सकिन्छ। रामजी लामिछाने र मौसम हिमालीको कोरियोग्राफी रहेको सिनेमाको मुख्य सहायक निर्देशक गिरिराज घिमिरे हुन्।
रिच इन्टरटेनमेन्ट, एप्पल इन्टरटेनमेन्ट र एफ.डी. कम्पनीले वितरणको जिम्मा लिएको यस चलचित्रको डिजिटल पार्टनर ओएसआर डिजिटल रहेको छ। स्मरण रहोस्, करिब दुई दशकअघि डा. भोला रिजालले निर्माण गरेको नेपालको पहिलो गीति चलचित्र ‘गौँथली’ ले बक्सअफिसमा ५१ दिन मनाउँदै अपार सफलता हासिल गरेको थियो। अहिले उनैका छोरा डा. कपिल रिजालले सोही नाममा यो नयाँ कथानक चलचित्र दर्शकमाझ ल्याउन लागेका हुन्।