‘सायद २’ का लागि कलाकार पक्का, बैंकर रविनाको छोरादेखी अनमोलकी हिरोइनसम्म

ठुलोपर्दा डटकम, काठमाण्डौ।
स्क्रिप्टमै वितरण कम्पनी एफडीबाट ३० लाख एमजी पाइसकेको वर्ष २०७३ मा बन्ने ‘सायद २’का लागि कलाकारहरु पक्का भएका छन् । चलचित्रका निर्माता सुनिल रावलले दिएको जानकारी अनुसार चलचित्रका लागि मुख्य भुमिकामा शुशिल श्रेष्ठ, आशिरमान देशराज श्रेष्ठ, सन्ध्या केसी र अमृत ढंगाना पक्का भएका हुन् ।

आशिरमान देशराज श्रेष्ठ बैंकर रविना देशराज श्रेष्ठ जोशीका छोरा हुन् । शुशिल यस अघि चलचित्र होस्टेल रिटन्र्सको मुख्य भुमिकामा देखिएका थिए भने सन्ध्या केसी मोडल तथा भिजे हुन् । सन्ध्याले नायक भूवन केसीको निर्देशनमा बनेको चलचित्र ‘ड्रिम्स’मा काम गरिसकेकी छिन् ।

चार बर्ष अघि प्रदर्शनमा आएको चलचित्र सायद दुर्गिश ब्यानरको पहिलो हिट चलचित्र हो । त्यसपछि उक्त ब्यानरले निर्माण गरेको होस्टेल पनि सुपरहिट भएको थियो भने तेश्रो चलचित्र होस्टेल रिर्टन्स् ले पनि सफलता हात पारेपछि दुर्गिश ब्यानरले चौथो प्रोजेक्ट सायद २ बनाउन लागेको हो ।

बलिउडका केही चलचित्रमा सहायक निर्देशक भएर काम गरेका पुष्पराज न्यौपानेले यो चलचित्रलाई निर्देशन गर्दैछन् । केही सफल बलिउड चलचित्रमा न्यौपानेले सहायक निर्देशक भएर काम गरिसकेका छन् । न्यौपानेले भारतका ‘डेन्जरस इस्क, राज ३, हेट स्टोरी २ र ३, म्याक्सिमम’ लगायतका चलचित्रमा सहनिर्देशन गरिसकेका छन् ।