नेपालमा औसत व्यापार गरेको चलचित्र ‘कोहलपुर एक्सप्रेस’ को आइतवार विशेष प्रदर्शन जापानमा गरिएको छ । यसका लागि अभिनेत्री द्वय केकी अधिकारी र प्रियंका कार्की जापान पुगेका थिए ।
ओम शान्ती ओम इन्टरटेन्मेन्ट र डेस्टिनी क्रियशनको संयुक्त आयोजनामा भएको यस चलचित्रको विशेष शोमा ३ सय बढी दर्शकको उपस्थिति रहेको थियो । अधिकांशले चलचित्रको तारिफ गरेका छन् । केकी यस चलचित्रकी निर्मात्री समेत हुन् ।
चलचित्रको विशेष शोमा नायिका प्रियंका कार्की रातो गाउनमा निकै खुलेकी थिइन् । यूवी थापाले उनका लागि यो पहिरन तयार पारेका थिए । यस्तै आकाशे रंगको गाउनमा केकीको सुन्दरता खुलेको थियो ।
गामबेशी चेपाङ बालबालिकाको सहयोगार्थ जापानको टोकियोमा रहेको नाकानो जिरो हलमा चलचित्रको प्रदर्शन गरिएको थियो ।
विशाल भण्डारको लेखन र निर्देशन रहेको यस चलचित्रमा केकी अधिकारी, ऋचा शर्मा, प्रियंका कार्की, विनोद न्यौपाने, बुद्दी तामाङ, रविन्द्र झा, कुशाग्र भट्टराईलगायतका कलाकारहरुको अभिनय रहेको छ ।
