सलोन भन्छन्, ‘निर्माताको पीडा झेलिसकेको छु’

नायक भुवन केसी अभिनीत चलचित्र ‘नेपाली बाबु’ मा बाल कलाकारको भूमिका निर्वाह गर्दै अभिनय क्षेत्रमा आएका नायक सलोन बस्नेत पुराना निर्देशक शोभित बस्नेतका छोरा हुन् । बाल कलाकारका रूपमा चार दर्जनभन्दा बढी चलचित्रमा अभिनय गरेका सलोन ‘हामी तीन भाइ’ पछि भने बालकलाकारको रुपमा देखिएका थिएनन् । यसपछि आठ वर्ष अभिनयबाट टाढिएका सलोनले चलचित्र ‘होस्टल’ बाट अभिनयमा कमब्याक गरे ।

‘होस्टल’ मा सलोनले अनमोल केसीको साथीको भूमिका निर्वाह गरेका थिए । ‘होस्टेल’ को व्यवसायिक सफलतापछि उनले ‘एउटा साथी, आभाष, आधा पेज, लब सब’ मा लिड नायकको रुपमा काम गरे । तर, नायक बनेर अभिनय गरेका यी कुनै चलचित्र चलेनन् । लिड हिरो भएर अभिनय गरेका चलचित्र सफल नभएपछि अहिले उनले सहायक भूमिकामा नै जोड दिइरहेका छन् ।

कमेडी टाइमिङमा उम्दा मानिने सलोन दशैंदेखि चलचित्र ‘ए मेरो हजुर ४’ को छायांकनमा व्यस्त छन् । ‘ए मेरो हजुर’ सिरिज उनी विना अपुरो मान्ने गरिन्छ । यसैले निर्देशक तथा अभिनेत्री झरना थापाले यो चलचित्रको सिरिजमा उनलाई छुटाएकी छैनन् । लकडाउनदेखि घरभित्रै सीमित भएका उनी माघबाट चलचित्र ‘डिसेम्बर फल्स’ को छायांकनमा व्यस्त हुने तयारीमा छन् । यसपछि उनले चलचित्र ‘हुतुतु’ लाई समय दिने बताइएको छ ।

स्थिति सामान्य भएपछि उनी आफैं पनि चलचित्र निर्माण गर्दैछन् । उनी र आमेश भण्डारीको मुख्य भूमिका रहने चलचित्रको नाम ‘रुम नम्बर १०८’ राखिएको छ । निर्माताको पीडा महशुस गर्न भए पनि एकपटक अभिनयमा सक्रिय कलाकार निर्माता बन्नुपर्छ भन्ने गरिन्छ । सलोन भने आफूले यसअघि नै निर्माताको पीडा झेलिसकेको बताउँछन् । २०५७ सालदेखि सलोन सलिना फिल्मस्बाट चलचित्र निर्माण भइरहेका कारण निर्माताको पीडा बुझेको उनको भनाई छ ।