पहिलो चलचित्रमा विपनाको पारिश्रमिक ५ हजार

नेपाली चलचित्र क्षेत्रमा डेढ दशक अगाडि नायिका विपना थापाको क्रेज उचाइमा थियो । तर, १४ वर्ष भयो उनी गुमनामजस्तै छिन् । चलचित्र वरमाला’ पछि वास्तविक जीवनमै भारतीय मुलका आयुतोष भारद्वाजलाई वरमाला पहिराएकी उनी यसपछि अभिनयमा फर्किइनन् । अहिले उनी १० वर्षिय छोराकी आमा समेत भइसकेकी छन् । अब भने उनी चलचित्रमा कमब्याक गर्ने तयारीमा छिन् ।

एक समय नेपाली चलचित्रकी निर्विकल्प अभिनेत्रीको रुपमा छाएकी उनले पहिलो चलचित्र ‘जन्मभूमि’ भने सुटिङ हेर्न जाँदा पाएकी थिइन् । आफ्नो नाममा खोलेको यूट्युब च्यानलमा पहिलो चलचित्र अफर हुँदाको क्षण सम्झँदै उनले भनेकी छन्, ‘म साथीहरुसँग सुनधारामा मोहन निरौला सरको टेलिचलचित्रको सुटिङ हेर्दै थिएँ । त्यस्तैमा भीडलाई खिच्दै आएको क्यामेरा मेरो फेसमा आएर अडिएछ ।’

उनी अगाडि भन्छिन्, ‘क्यामेरामा मलाई देखेपछि मोहन सरले बोलाएर चलचित्र प्रस्ताव गर्नुभयो । म अक्कनबक्क भएँ । मैले परिवारमा आएर कुरा गर्नु भनेपछि मोहन सर, निर्माता छविराज ओझा भोलीपल्टै घरमा आएर कुरा गर्नुभयो । स्क्रिप्ट र मेरो भूमिका सुनेपछि परिवारले ‘ओके’ गर्नुभयो । त्यसपछि मलाई ५ हजार दिएर छवि दाईले ‘जन्मभूमि’ साइन गराउनुभएको थियो ।’

उनी आफ्नो पहिलो सिन नै ‘वान टे ओके’ भएको सम्झन्छिन् । तर, पहिलो सिनमा नै गर्भवती महिलाको गेटअपमा देखिन लाज लागेर उनी चलचित्र नै छाड्ने निधोमा पुगेकी थिइन् । उनी सम्झन्छिन्, ‘गाउँका सबै मान्छे सुटिङ हेर्न आएका थिए । त्यही दिन मैले गर्भवती महिलाको सिन दिनुपर्ने थियो । तर, लाजले मैले त्यो सिन गर्नै मानिनँ । एकदमै रोएर चलचित्र नै गर्दिनँ भनको थिएँ ।’

कलाकार बसुन्धारा भुषालले सम्झाइ बुझाइ गरेपछि आफू गर्भवती महिलाको सिन दिन तयार भएको भिडियोमा विपनाले भनेकी छन् । चलचित्रमा पहिलो सिन नै रुँदै घरबाट बाहिर निस्कनु पर्ने भएकाले पनि ‘वान टे ओके’ भएको उनी सम्झन्छिन् । ‘जन्मभूमि’ रिलिज लगत्तै एकसाथ ६ वटा चलचित्र साइन गरेर आफू नेपाली चलचित्रको सबैभन्दा व्यस्त अभिनेत्री भएको उनले बताएकी छन् ।

भिडियो :-