आगलागीले ध्वस्त भएको म्याजिक हल साढे २ करोडमा फेरि ठडियो



गत भदौ १२ गते विद्युत सर्ट भएर आगलागी भएको सुनसरीको झुम्का रामधुनीस्थित म्याजिक सिनेमा हल ६ महिनामै पुरानो अवस्थामा फर्किएको छ । आगलागीका कारण २ करोड क्षति भएको हललाई साढे २ करोड खर्च गरेर सुविधा सम्पन्न बनाइएको छ । हलका सञ्चालक पर्शुराम चौधरीले पहिलाको कमी कमजोरीलाई सच्याउँदै हललाई नयाँ स्वरुपमा साजसज्जाका साथ तयार गरेको जानकारी दिए ।

उनले भने- ‘अहिले हलको रुपरंग नै बदलिएको छ । ५.१ साउन्ड सिस्टम पहिला पनि थियो । अहिले एमपी फाइभसँगै ६ वटा अत्याधुनिक स्पिकरहरु थपेको छु । पर्दा पछाडिको बुफर दुईवटा बनाएको छ । पहिला डिजिटल प्रोजेक्टर थियो । अहिले एचडी डिजिटल बनाएको छु । पर्दाको लम्बाई र चौडाई पनि बढाएँ । कुर्सीहरु पनि पहिलाकोभन्दा अहिले एकदमै आरामदायी छ ।’

अहिले सबै सामानको मुल्य आकाशिएकाले हलको लागत बढेको सञ्चालक चौधरी बताउँछन् । सांस्कृतिक कार्यक्रम गर्न मिल्ने गरी हलको स्टेजसँगै क्लब लाइटिङको पनि व्यवस्था गरिएको उनले जानकारी दिए । अब हल चलचित्र प्रदर्शनका लागि तयार भएको र सरकारले सिनेमा हल खोल्न अनुमति दिएपछि ठूलो नेपाली वा विदेशी चलचित्रबाट हललाई सञ्चालन गर्ने उनले बताए ।

लामो समय नेपाली चलचित्रमा सम्पादक र साउन्ड डिजाइनरको रुपमा काम गरेका म्याजिक सिनेमा हलका सञ्चालक चौधरी चलचित्रप्रति माया भएकै कारण पुनः ठूलो खर्चमा हललाई तयार गरेको बताए । थारु भाषाको पहिलो चलचित्रको निर्माता समेत गरेका उनी हलले गति लिएपछि फेरि चलचित्र निर्माणमा फर्किने योजनामा छन् । उनले केही नेपाली चलचित्रमा अभिनय पनि गरेका छन् ।

प्रतिक्रिया दिनुहोस्
About Thuloparda

Thuloparda Media Pvt. Ltd.

Reg No.: 160/073-74 (Suchana Vibhag, Nepal)

Publisher: Jiwan Kumar Parajuli

Editor: Subrat Raj Acharya

Phone: 9851194755

Address: Anamnagar, Kathmandu, Nepal

Email: [email protected]

All the photos & other materials, do not use or reproduce without authorized permission.

Designed by Appharu