स्थानीय तहको निर्वाचनले गर्दा ‘चिसो मान्छे’ को रिलिज सर्ने

सरकारले आगामी बैशाख ३० गते स्थानीय तहको निर्वाचन गर्ने घोषणा गरेपछि यही मितिमा प्रदर्शनमा आउन लागेको चलचित्र ‘चिसो मान्छे’ को रिलिज सर्ने भएको छ । निर्वाचनको दिन सार्वजनिक विदा हुने र यातायात आवातजावत पनि ठप्प हुने भएकाले चलचित्रको रिलिज सार्ने निर्णयमा निर्माता पुगेका हुन् । चाँडै चलचित्रको नयाँ प्रदर्शन मिति घोषणा गर्ने तयारीमा निर्माण टिम छ ।

निर्देशक दीपेन्द्र के. खनालले भने- ‘अब चलचित्रको रिलिज नसारेर पनि के गर्नु ? विकल्प नै छैन । अब बैशाख ३० भन्दा अगाडि चलचित्र रिलिज गर्न सकिन्छ कि पछाडि भनेर अहिले हामी छलफलमा छौं । म त फागुन १३ गते पनि चलचित्र लगाउन तयार छु । किनकि, चलचित्रदेखि टिजरसम्म सबै तयार छ । सम्भवतः यसै साता चलचित्रको नयाँ प्रदर्शन मिति घोषणा गर्नेछौं ।’

‘आमा’ निर्मात्री शर्मिला पाण्डेको लगानीमा निर्माण भएको चलचित्रमा स्वस्तिमा खड्का र अर्पण थापा पनि मुख्य भूमिकामा छन् । यस्तै, चलचित्रमा देशभक्त खनाल, आशान्त शर्मा, झकेन बीसी लगायतका कलाकारहरुको पनि अभिनय रहेको छ । चलचित्रको निर्देशन, कथा, पटकथा, संवाद र छायांकन दीपेन्द्र के. खनालको हो । अब यो चलचित्र जेठमा रिलिज हुने सम्भावना बलियो छ ।