कोरोना महामारीका कारण करीब दुई वर्ष सिनेमा हलहरु बन्द भएपछि नेपाल चलचित्र संघले नेपाली चलचित्रको प्रदर्शन व्यवस्थित गर्नका लागि गत असोजबाट तीन महिनासम्म एकै मितिमा दुई नेपाली चलचित्र रिलिज नगर्ने घोषणा गरेको थियो । पछि यो अवधि लम्ब्याएर बैशाख १ गतेसम्म पुर्याइयो । यही नियमका कारण गत पुषमा ‘कठपुतली’ सँग ‘चपली हाइट ३’ भिड्न पाएन ।
चलचित्र संघले सबैभन्दा पहिला संघमा निवेदन दिएर मिति बुक गर्ने चलचित्रलाई प्रदर्शनको अनुमति दिने बताएको थियो । तर, यसपटक संघले आफ्नै निर्णय लत्याउँदै पहिला नै संघमा निवेदन दिएर प्रदर्शन मिति बुक गरेको चलचित्रमाथि अर्को चलचित्र भिडाउने निर्णय गरेको छ । संघले फागुन १३ गते चलचित्र ‘लप्पन छप्पन २’ सँग ‘म यस्तो गीत गाउँछु २’ भिडाउने निर्णय गरेको हो ।
यो मिति सबैभन्दा पहिला ‘लप्पन छप्पन २’ ले रोजेको थियो । चलचित्रको निर्माण टिमले संघमा निवेदन दिएर प्रदर्शन मिति पनि टिपायो । तर, यसै साता चलचित्र संघ र निर्माता संघको एक कार्यदलले फागुन १३ गते ‘म यस्तो गीत गाउँछु २’ लाई पनि रिलिज अनुमति दिएपछि विवाद सुरु भएको छ । एकै मितिमा दुई नेपाली चलचित्र भिडाउने निर्णयको अहिले विरोध भइरहेको छ ।
यसबीच, ‘लप्पन छप्पन २’ को निर्माण कम्पनी गोल्डेन हिल्स पिक्चरले बिहीवार एक विज्ञप्ति जारी गर्दै फागुन १३ गते ‘म यस्तो गीत गाउँछु २’ लाई प्रदर्शन गर्न दिने चलचित्र संघको निर्णयप्रति आपत्ति जनाएको छ । निर्माता निर्मल कुमार मिश्रद्वारा हस्तारक्षित विज्ञप्तिमा गत पुष १९ गते चलचित्र संघमा निवेदन दिएर (दर्ता नं. ३५१) चलचित्रको प्रदर्शन मिति दर्ता गरेको उल्लेख गरिएको छ ।
निर्माता मिश्रले ‘लप्पन छप्पन २’ को प्रदर्शनका लागि सम्पूर्ण प्रक्रिया पूरा गरिसकेको र आफ्नो चलचित्रलाई प्रदर्शन अनुमति दिन चलचित्र संघसँग आग्रह गरेका छन् । मुकुन्द भट्ट निर्देशित चलचित्रमा शिव श्रेष्ठ, सौगात मल्ल, अनुपविक्रम शाही, अर्पण थापा लगायतको अभिनय छ । कोरोना महामारीका कारण दुई वर्षदेखि अड्किएर बसेको यो चलचित्र ठूलो बजेटमा निर्माण भएको हो ।