एक नाबालिग गायिकालाई जबर्जस्ती करणी गरेको आरोप लागेका अभिनेता तथा मोडल पल शाहलाई थप १२ दिन थुनामा राखेर अनुसन्धान गर्न जिल्ला अदालत तनहुँले प्रहरीलाई अनुमति दिएको छ । आइतवार दिउँसो प्रहरीले एक हप्ताको अनुसन्धान पूरा गरेर पल शाहलाई म्याद थप गर्नका लागि तनहुँ जिल्ला अदालत लगेको थियो ।
प्रहरीलाई अदालतको अनुमतिमा २४ दिनसम्म हिरासतमा राखेर अनुसन्धान गर्ने अनुमति हुन्छ । एक सातादेखि प्रहरीले यो केशलाई हरेक कोण र आधारबाट अनुसन्धान गरिरहेको छ । सम्भवतः १२ दिनपछि अदालतमा बहस प्रक्रिया सुरु हुन सक्नेछ ।
१७ वर्षिय एक नाबालिग गायिकाले पलमाथि जबर्जस्ती करणीको आरोपमा फागुन ११ गते तनहुँ जिल्ला प्रहरी कार्यालयमा जाहेरी दिएकी थिइन् । यसपछि चार दिन फरार रहेका पल गत आइतवार प्रहरीसमक्ष उपस्थित भएका थिए । गायिकाले विभिन्न समयमा पटक-पटक जबर्जस्ती बलात्कार गरेको आरोप शाहमाथि लगाएकी छन् । उनले चितवन गैंडाकोटको प्रहरी कार्यालयमा पनि पलविरुद्ध जबर्जस्ती करणीको जाहेरी दिएकी छन् ।